Qazaqstanda búgin parlament senaty depýtattyǵyna kandıdat usyný bastaldy. Osynyń qarsańynda el prezıdenti Nursultan Nazarbaev senat depýtattarynyń kezekti saılaýyn maýsymnyń 28-i kúni ótkizý týraly jarlyq shyǵarǵan, dep habarlaıdy Qamshy  aqparattyq agenttigi azattyq.org-ke silteme jasap.

Ortalyq saılaý komısıasy tóraǵasy Berik Imashevtyń aıtýynsha, 2011 jylǵy tamyzdyń 19-ynda saılanǵan senat depýtattarynyń ókilettigi bıyl tamyzdyń 31-inde aıaqtalady. Bıylǵy saılaýda Qazaqstannyń 16 óńirinen senatqa bir-bir depýtattan saılanady. Senat depýtattyǵyna kandıdat usyný mamyrdyń 28-ine deıin, olardy tirkeý - maýsymnyń 7-ine sheıin júrgiziledi.

Qazaqstan zańnamasy boıynsha, senat depýtaty janama saılaý jolymen – jergilikti máslıhattar depýtattarynyń daýys berýi arqyly saılanady. Konstıtýsıa men saılaý týraly zańǵa sáıkes, jasy 30-ǵa tolǵan, joǵary bilimi bar jáne jumys stajy bes jyldan kem emes, el aýmaǵynda sońǵy on jyl boıy jáne ózi daýysqa túsetin óńir aýmaǵynda keminde úsh jyl turaqty turatyn Qazaqstan azamaty parlament senatynyń depýtaty bola alady.

Parlament senatyndaǵy 47 depýtattyń 15-in el prezıdenti taǵaıyndaıdy, 32-sin (el astanasy men respýblıkalyq mańyzy bar qaladan jáne ár oblystan eki-eki adamnan) jergilikti máslıhattar 6 jylǵa saılaıdy. Depýtattardyń jartysy úsh jyl saıyn jańaryp turady. Sońǵy ret senat saılaýy 2014 jyly qazanda ótken.