AQSH prezıdenti Donald Tramp Twitter jelisindegi mıkroblogynda KHDR ushyrǵan zymyran sátsizdikke ushyraǵanyn jazdy, dep habarlaıdy Qamshy aqparattyq agenttigi Tengrinews.kz portalyna silteme jasap.

"Soltústik Koreıa Qytaıǵa jáne onyń syıly tóraǵasy Sı Szınpınniń tilegine qurmet kórsetpedi, olar búgin zymyran ushyrdy, alaıda onysy sátsizdikke tap boldy", - dep jazdy Tramp. 

Aıta keteıik, Tramp Soltústik Koreıanyń ıadrolyq baǵdarlamadan bas tartýy úshin, Phenánǵa qysym kórsetý maqsatynda Sı Szınpınmen kelissózder júrgizip mámilege kelgen bolatyn. 

Eske salaıyq, osyǵan deıin ońtústikkoreıalyq BAQ tańǵy jergilikti ýaqyt boıynsha 05.30-da (Astana ýaqyty boıynsha 02.30-da) KHDR Phenan-Namdo provınsıasynyń Pýkchhan aýdanynan soltústik-shyǵysqa qaraı baǵyttap zymyran ushyrdy. Mamandardyń aıtýynsha, zymyran ushyp shyqqannan keıin birneshe sekýndtan soń jarylyp ketken. 

Soltústik Amerıkanyń áýe-ǵarysh qorǵanysy basqarmasynyń málimetinshe, zymyran Soltústik Koreıanyń shekarasynan aspaǵan jáne Soltústik Amerıka úshin esh qaýip joq.