Keıýana osydan birneshe aı buryn ortanshy uly Marbulannan aı saıynǵy 7 myń teńge alımentti óndirip alǵan. Endi anasyna qaramaı ketken úlken uly Marlen de sheshesine aı saıyn dál osyndaı somadan berip turatyn boldy, dep jazady Qamshy aqparattyq agenttigi.

KTK tilshisiniń habarlaýynsha, 73 jastaǵy Kámıa ájeı tústen keıin bolǵan sotqa bara alǵan joq. Aıtýynsha, ulynan taıaq jep, onsyz da dimkás densaýlyǵy álsirep qalǵan. Uly, tipti, alqymymnan alyp, tunshyqtyrǵan kórinedi.  Kámıa ájeı bolsa úsh kún tamaq ishe almaı qalǵan.

Úlken ul sotqa aryz bergenge ashýlanyp, osylaı istedi deıdi qarıa. Anasy tipti polısıaǵa habarlasyp, kógergen denesine saraptama jasatqan.

«Sonymen maǵan aıtady, aryzyńdy keri qaıtaryp al, bizge tıispe, deıdi. Sosyn men Allaı, Allaaı dep zorǵa kettim. Oıladym, jyndanyp ketem dep», - dep janaıqaıymen bólisti Kámıa Muqasheva.

Al sotqa kelgen uly Marlen, anama qol tıgizgen joqpyn, kerisinshe, «sheshem maǵan jala jaýyp otyr» dep bezildedi. Aıtýynsha, ol dál sol kúni jumysta bolǵan. Muny áriptesteri aıǵaqtaı alady eken.

«Ol bizdiń anamyz emes. Balalarynyń basyn biriktirýdiń ornyna aramyzǵa iritki salady. Bala kezimizde de qıt etse, bizdi tastap, tórkinine qashyp ketetin. Bizdi ákemiz ósirdi. Ana deıtindeı esh jylylyq kórmeı óstik. Tili sala qulash», - dep jaýap berdi Marlen Muqashev.

Talap aryzǵa saı anasy ulynan 22 myń teńge alıment suraǵan eken. Alaıda sot barysynda taraptar ortaq mámilege keldi. Az ýaqytqa sozylǵan saýda 7 myńǵa kelip tireldi. 42 myń teńge jalaqy alatyn uly 70 myń teńge zeınetaqysyn jalǵyz basyna jetkize almaı otyrǵan sheshesine osy somany aı saıyn berip turýǵa kelisti.

Osydan úsh jarym aıdaı buryn bes balanyń anasy Kámıa Muqasheva ekinshi uly Marbulannan da dál osyndaı kólemde alıment ónidirgen. Alaıda sot sheshimi áldeqashan kúshine ense de, ol áli anasyna bir tıyn da tólemepti. Keıýana endi ony sot oryndaýshylary arqyly óndirip kórmek.