Almaty qalasy Qylmystyq ister jónindegi mamandandyrylǵan aýdanaralyq sotynda «Fenıks» fılmi boıynsha ótýi qajet bolǵan sot prosesi Tuńǵyshbaı Jamanqulovtyń syrqattanyp qalýyna baılanysty keıinge shegerildi.
İsti júrgizýshi sýdıa Táken Shakırov eger Jamanqulov kelesi sotqa qatyspaıtyn bolsa, ony qamaýda ustaý sharasyna ózgertetinin aıtyp, eskertý jasady, dep habarlaıdy Qamshy aqparattyq agenttigi QazAqparatqa silteme jasap.
Sotta Tuńǵyshbaı Jamanqulovtyń avdokaty qorǵaýyndaǵy azamattyń 4 mamyrdan bastap, emhanada stansıonarlyq emdelýde jatqanyn rastaıtyn anyqtamany sýdıa Táken Shakırovke tabys etti . Anyqtamada Tuńǵyshbaı Jamanqulovqa arterıaldy gıpertonıa, júrek aýrýyna qatysty dıagnoz qoıylǵany kórsetilgen. Onyń advokaty Tuńǵyshbaı Jamanqulovtyń túnde jaǵdaıy kúrt nasharlap, aýrýhanaǵa alyp ketkenin aıtqanymen, sýdıa Shakırov buǵan narazylyq tanytty.
«Biz Jamanqulovsyz sotty bastaı almaımyz. Ótken sot prosesinde Jamanqulov ótinimhat berip, ekonomıkalyq sarapshylar shaqyrtýdy suraǵan, biz onyń suraýy boıynsha 3 sarapshyny shaqyrttyq, kele jatyr. «31 arna» mamandaryn fılm («Fenıks» - red.) tızeri boıynsha aldyrtyp jatyrmyz. Barlyǵynyń da densaýlyǵy nashar, barlyǵynyń da jumysy bar. Ásirese, qamaýda otyrǵandardyń (Jánibekov, Ysqaqova, - red) densaýlyǵyn tekserse aqaý shyǵady. Eger ol kelesi joly sotqa kelmeıtin bolsa, ony qamaýda ustaý sharasyn ózgertetin bolamyn. Osyny jetkizińizder. Ol sotqa qatysy alady. Men ony qamaýda ustaý sharasyna ózgertetin bolsam, ol «sol jerde» otyratyn bolady da biz bul isti aıaǵyna jetkizetin bolamyz. Adamdar jumysynan suranyp kelip otyr», - dedi Taken Shakırov.
Osydan keıin Jamanqulovtyń advokaty sot otyrysyn basqa kúnge aýystyrýdy surady.
Sýdıa Shakırov Tuńǵyshbaı Jamanqulovtyń naqty qaıda em alyp jatqanyn surady. Avdokat burynǵy «Sovmın», qazirgi QR Prezıdenti is basqarmasy Medısınalyq ortalyǵy Ortalyq klınıkalyq aýrýhanasynda ekenin aıtty. Alaıda, sýdıa bul aqparatty da anyqtaýdy tapsyrdy.
Kelesi sot otyrysy 12 mamyrǵa belgilendi.
Eske sala keteıik, 28 sáýir kúni Fenıks» kınokartınasyna bólingen qarajatty qoldy etip, maqsatsyz jumsady dep aıyptalyp otyrǵan fılm rejıseri Talǵat Jánibekovti qamaýda ustaý merzimi bir aıǵa, 2017 jyldyń 28 mamyryna deıin uzartylǵan bolatyn. 27 sáýir kúni ótken sot otyrysynda Tuńǵyshbaı Jamanqulov sýdıaǵa ótinimhat berip, is boıynsha ekonomıkalyq saraptama taǵaıyndaýdy suraǵan. Bul áreketin Tuńǵyshbaı Jamanqulov «QazAqparat» tilshisine bylaı dep túsindirgen bolatyn. «Qarjy polısıasy óz saraptamasyn jasaǵan. Biz jumys jasalǵanyn dáleldeý úshin ekonomıkalyq saraptama komısıasyn qurýdy suraımyz. Ol saraptama toby QR Ádilet mınıstrligi tarapynan, óner salasyn biletin, fılmdi túsinetin mamandardy quramyna engize otyryp qurylsa deımiz. Kıno túsirý tásilin biletin adamdar bolǵany óte mańyzdy», - degen edi Tuńǵyshbaı Jamanqulov.
