Jeńis kúnin merekeleý qarsańynda elordada UOS ardagerleriniń jáne tyl eńbekkerleriniń qatysýymen saltanatty kezdesýler ótedi, dep habarlaıdy Qamshy aqparattyq agenttigi  Astana qalasy ákimdiginiń baspasóz qyzmetiniń málimetine súıenip.

«Esil» aýdanynda Uly Otan soǵysyndaǵy Jeńistiń 72 jyldyǵyn merekeleý qarsańynda Ardagerler keńesimen birlesip sharalar jospary ázirlendi. Onyń sheńberinde konserttik baǵdarlamalar, «Radı jıznı na Zemle», «Poklonımsá tem godam», «Za svetýshıı maı 1945 goda», «Baqyt gúlin tergen kún», «Uly Jeńiske myń taǵzym» taqyryptarynda synyp jáne kýrator saǵattary, «Jeńis ánderi» patrıottyq ánder baıqaýy, «Men Qazaqstan azamatymyn», «Potomkı pomnát slavnýıý Pobedý», «Biz beıbitshilikti súıemiz» jas sýretshiler baıqaýy ótedi.

29 sáýirde «Esil» aýdany Ardagerler keńesi zeınetkerleriniń jáne №76 mektep oqýshylarynyń qatysýymen Uly Dala kóshesinde kóshet otyrǵyzý sharasy uıymdastyrylady. Sondaı-aq túrli kompanıalar men SOS keshenderiniń, bıznes ortalyqtardyń qoldaýymen UOS ardagerleriniń úılerine baryp, azyq-túlik sebetterin, aqshalaı kómek jáne gúl shoqtaryn tabystaý aksıasy ótkizilmek.

Bir aı boıy UOS men tyl eńbekkerleri bolyp tabylatyn 15 adamǵa tegin medısınalyq tekserýden ótý múmkindigi beriledi. Aıta keteıik, 9 mamyrda UOS ardagerleri men tyl eńbekkerleri «Otan qorǵaýshylar» monýmentine gúl qoıý rásimine qatysady. Qalyptasqan dástúr boıynsha UOS ardagerlerine arnalǵan shatyrda konserttik baǵdarlama uıymdastyrylyp, merekelik dastarqan jaıylady.

Búgingi kúni elordada 125 UOS ardageri turady. Bıyl jyl saıynǵy bir rettik tólemdi eskergende ardagerlerge 500 myń teńgeden qarjylaı qoldaý kórsetiledi.