5 mamyrda Almaty qalasyndaǵy Sátbaev atyndaǵy Qazaq ulttyq tehnıkalyq ýnıversıtetiniń úlken zalynda ánshi Ibragım Eskendirdiń «Kók týdyń jelbiregeni» atty patrıottyq konserti ótti. Tyńdarmandy rýhty ándermen terbetken erekshe konsertten keıin QR «Daryn» memlekettik syılyǵynyń ıegeri, patrıottyq ánderdiń oryndaýshysy Ibragım Eskendirdi az-kem áńgimege tarttyq. «Elge, jerge, otanǵa degen mahabbat onyń rámizderin qurmetteýden bastalady» deıtin Elbasymyzdyń sózi bar dep áńgimesin bastady ánshi.
Ánshiniń aıtýynsha bul konsert «Kók týdyń jelbiregeni» atty joba aıasynda uıymdastyrylyp otyr. «Jas Otan» JQ QR Prezıdenti Nursultan Ábishuly Nazarbaevtyń «Bolashaqqa baǵdar: rýhanı jańǵyrý» atty maqalasyndaǵy «Jańa turpatty jańǵyrýdyń eń basty sharty - ulttyq kodyńdy saqtaı bilý» degen sózin negizge ala otyryp, QR memlekettik rámizderiniń 25 jyldyq merekesine oraı «Kók týdyń jelbiregeni» atty jańa jobany qolǵa alǵan.
Atalmysh joba aıasynda «Kók týdyń jelbiregeni» ánimen tanymal bolǵan, keshe ǵana tusaýy kesilgen «Oıan qazaq!» ánimen kórermen yqylasyna bólengen, «Jas Tulpar» qozǵalysynyń 50 jyldyǵyna oraı «Eń úzdik patrıottyq óleń» nomınasıasy boıynsha «Jas Tulpar» syılyǵynyń ıegeri atanǵan Ibragım Eskendir alǵashqylardyń biri bolyp erekshe patrıottyq jobany qolǵa alyp, eldi aralaýǵa shyqqan.
Ol Almatyǵa deıin 2 mamyrda Qyzylorda qalasyndaǵy Asqar Toqmaǵanbetov atyndaǵy konsert zalynda konsert berdi. Búkilrespýblıkalyq konsertin Ibragım Eskendir ádeıilep alǵashqy Astanamyz bolǵan Qyzylorda qalasynan bastaǵan. Odan ári konsert Shymkent, Taraz, Almaty qalalarynda ótip, elimizdiń basqa da aımaqtarynda jalǵasyn tappaq. Búgin ánshi Jetisý óńirinde, Taldyqorǵan qalasynda tyńdarmanymen jolyǵady.
Jyl sońynda Almaty men Astanada óner saparyn qorytyndalap, gala konsert berýdi josparlaǵan ánshi eldiń túkpir-túkpirinde konsert qoıý barysynda tek ónerin pash etip qana qoımaıdy, halyqtyń túrli áleýmettik máselelerimen tanysyp, eldiń jaıymen qanyǵyp, partıa deńgeıinde sheshilýine kúsh salatyn bolady.
Aıta keterligi, ánshiniń repertýary birqatar patrıottyq ándermen tolyqqan. Aıdyń basynda Ibragım Eskenderdiń «Oıan, Qazaq» áni tyńdarmandaryna jol tartqan edi. «Oıan, Qazaq» Qyzylorda da alǵash ret shyrqalsa, Almatydaǵy konsertte Ánshiniń repertýary taǵy bir patrıottyq «Álemde bar qazaqta bir Otan bar» atty ánniń tusaýy kesildi. Án avtory Erlan Tóleýbaıdyń aıtýynsha atalmysh ánge «Elbasy-kýrstastary» qorynyń vıse prezıdenti Qulan Chýrenov pen keńesshisi Muhambetkárim(Torǵaı) Eleýbaıdyń qoldaýymen klıp túsiriledi.
Suhbattasqan: Nurǵalı NURTAI
