Astanadaǵy Qazaq eli alańynda QR Qarýly Kúshteriniń 25 jyldyǵyna arnalǵan áskerı parad ótti dep habarlaıdy Qamshy aqparattyq agenttigi. Buǵan deıin habarlaǵanymyzdaı, bul táýelsiz Qazaqstan tarıhyndaǵy eń úlken áskerı parad boldy. Paradty Facebook jelisinen "Atameken bıznes arnasy" tikeleı efırden kórsetti.

Alańǵa Elbasy  Qarýly Kúshterdiń Joǵarǵy Bas Qolbasshysy Nursultan Nazarbaev keldi.

«Qarýly Kúshterimiz ár ýaqytta da  Táýelsizdigimizdiń basty tiregi bolyp qala beredi. Sizder ózderińizdiń qasıetti boryshtaryńyzdy adal atqaryp, týǵan  jerimizdiń tynyshtyǵyn qorǵańyzdar, ózderińizdiń kásibı sheberlikterińizdi, jaýyngerlik daǵdylaryńyzdy arttyryp, jaýyngerlik baýyrlastyq pen birlikti nyǵaıtyńyzdar. Mereıtoılyq sherýdiń qazaqstandyq armıanyń áskerı qýatyn, joǵary rýhyn kórsetetindigine senimdimin», - dedi prezıdent.

QR Qorǵanys mınıstri Sáken Jasuzaqovqa Áskerı parad qolbasshysy, QR Qarýly Kúshteri Qurlyq áskeriniń bas qolbasshysy, general maıor Murat Bektanov áskerı parad týraly baıanat jasady. Qorǵanys mınıstri Elbasyna - Bas qolbasshyǵa parad daıyn dep baıandady.

Sherýde 5000-nan astam áskerı qyzmetshiler saltanatty marshpen júrip ótti, 300-ge jýyq áskerı tehnıka men zamanaýı qarý-jaraq túrleri jurtshylyq nazaryna usynyldy. 70-ke jýyq áýe tehnıkasy Qazaqstannyń avıasıalyq áleýeti men jaýyngerlik ázirligin pash etti.