Búgin Qazaqstan Prezıdenti Nursultan Nazarbaev Ekinshi dúnıejúzilik soǵysyndaǵy Jeńistiń 72 jyldyǵyna oraı Astanadaǵy "Otan qorǵaýshylar" monýmentine gúl shoqtaryn qoıdy, dep habarlaıdy Qamshy aqparattyq agenttigi.
«Biz - Jeńiske jetken babalardyń urpaǵymyz. Sol babalarymyzdyń, ákelerimizdiń, atalarymyzdyń arqasynda, minekeı, 70 jyl boıy beıbit ómir súrip kele jatyrmyz. Ony esh ýaqyt umytpaý kerek. Eger bizdiń babalarymyz sol soǵysta Jeńiske jetpese, halimiz qalaı bolar edi? Qazaqstan búgingideı bolar ma edi, bolmas pa edi? Mynaý aspanymyz osyndaı ashyq bolar ma edi? Mynaý jastarymyz jarqyrap kúler me edi, kúlmes pe edi? Munyń barlyǵy osy ardagerlerimizdiń jeńisi», - dedi Elbasy óz sózinde.
Prezıdent jáne alańǵa jınalǵan qaýym Ekinshi dúnıejúzilik soǵysta qaza bolǵan jaýynger qazaqstandyqtardy bir sát únsizdikpen eske aldy. Resmı rásimnen keıin QR Respýblıkalyq úrmeli aspaptar orkesteri elimizdiń Gımnin oryndady. Osydan keıin Qurmetti qaraýyl rotasy QR Qarýly Kúshteriniń Joǵarǵy Bas Qolbasshysynyń jáne Uly Otan soǵysy ardagerleriniń aldynda saltanatpen sap túzep júrip ótti.
Gúl shoqtaryn qoıý rásimine Ekinshi dúnıejúzilik soǵys ardagerleri, QR Prezıdenti Ákimshiliginiń, QR Úkimetiniń, QR Parlamentiniń, ortalyq memlekettik organdarynyń, dıplomatıalyq korpýstardyń ókilderi jáne qala jurtshylyǵy qatysty.
Sońǵy derekter boıynsha, Qazaqstannan maıdanǵa attanǵan 1 mln 200 myń jaýyngerdiń 600 myńy úılerine qaıtyp oralmady. Jalpy, burynǵy Keńes Odaǵynyń 27 mıllıonǵa jýyq adamyn jalmaǵan qandy qyrǵynda elimizden attanǵan 500-den astam jaýynger 1934 jyly bekitilgen eń joǵarǵy Keńes Odaǵynyń Batyry atanǵan bolatyn, onyń 100-den astamy - qazaqtar. Sonymen qatar 142 qazaqstandyq Dańq ordeniniń tolyq ıegeri atansa, Keńes Odaǵynyń orden, medaldarymen marapattalǵan qazaqstandyqtar sany 100 myńǵa jýyqtaıdy. Soǵys ardagerleriniń qatary jyl ótken saıyn sırep barady. Búginde Qazaqstanda Uly Otan soǵysynyń 2 myńǵa jýyq ardageri turady.
Sholýshy: Gúlim JAQAN
