Aqtóbe oblysynda sý tasqynynan zardap shegip, bılikke úndeý aıtqan oqýshy qyzdyń kórshileri olardyń úıin sý baspaǵanyn málimdep otyr. Aty-jónin ataǵysy kelmegen áıel Internette vıdeosy taralyp, kópti eljiretken qyz ben onyń sheshesin basqa bireýdiń sý alǵan úıiniń fonynda vıdeo túsirip, qoldanyp ketti degendi aıtty, - dep habarlaıdy Qamshy aqparattyq agenttigi Tengrinews.kz portalyna silteme jasap.

Al qyzǵa osy vıdeo Qaznette taralǵannan keıin bıznesmenderdiń úsh bólmeli páter syılaǵany belgili.  Eshimovter otbasynyń kórshisi BAQ ókilderine oqýshy qyz jylap turǵan vıdeoda Talǵat Lepesovter otbasynyń sý alǵan úıi ekenin habarlady. 

"Olardyń áleýmettik jelilerde taratqan vıdeosynda kórsetilgen úıdiń qulaǵany ras, biraq ol olardyń úıi emes, olardyń úıi saý tur, biraq sonda da olar Talǵat Lepesovterdiń qulaǵan úıiniń aldynda vıdeo túsirgen", - dedi Mahabbat Eshimovanyń kórshisi. Áıeldiń BAQ ókilderine bergen suhbaty Instagram jelisine júktelip úlgerdi. Qazirgi ýaqytta Qaznette osy máselege qatysty daý shyqty. 

Osy daýǵa qatysty qyzdyń anasy Turǵangúl Eshimova pikir bildirdi. 

"Biz bul týraly bilemiz, kórshilerdiń osyndaı aıyp taǵyp otyrǵany bizge belgili, bul jalǵan. 14 sáýirde bizdiń úıdi sý shaıyp ketti, turǵyndardyń eshqaısysynyń úıi saý bolmady. Barlyǵynyń úıin sý shaıyp ketti. Meniń kúıeýim júrek talmasyna ushyrap, tipti sóıleı de almaı qaldy, endi ary qaraı qalaı ómir súremiz? Ol aýrýhanada bolǵanda bizdi mektepke evakýasıalady. Sosyn biz páterde turyp keldik. Jýrnalıser sújet túsirip jatqanda sý alǵan úılerdiń turǵyndaryna suraq qoıdy. Qyzym Mahabbat sol kezde meniń aldyma shyǵyp alyp, óte qatty ashýlanyp, sóılep tastady. Sol kezde ol ákesin qatty ýaıymdady, úıdi de ýaıymdady, sóıtip, jylaǵan bolatyn", - dedi sheshesi.

Áıel Internette taralǵan vıdeony bóten adamdardyń túsirgenin aıtyp otyr. Mahabbattyń otbasy rolıktiń bulaısha taralyp ketetinin bilmegen eken.

"Ol bizdiń úıdi sý alǵanyn aıtty, bul ras. Vıdeoda qaı úıdiń turǵanynda ne baılanysy bar? Qyzym artymyzda turǵan úıdi aıtqan joq. Sosyn bıznesmen Qaırat Qudaıbergen kelip, páter syılady. Osydan keıin adamdar bizden osy jaǵdaıymyzdy qyzǵana bastady. Kórshiler osy vıdeony jazyp, ótirik aıtyp jatyr dep málimdedi", - dep narazylyǵyn bildirdi Eshimova.

Qyzdyń anasynyń aıtýynsha, Mahabbatty mekteptegiler ótirikshi dep ataıdy. Ózine tym kóp adamnyń nazary aýǵandyqtan, qyzy kóp jylap júr eken. 

"Kórshilerimiz memleketten úı alady, biz almaımyz. Endi nege bulaı jasap jatyr? Men endi prokýratýraǵa jáne sotqa osy áıeldiń bizge jala jabýy isi boıynsha aryz túsiremin, eldiń kózinshe bizdi alaıaq qylyp kórsetti", - deıdi qyzdyń anasy Turǵangúl Eshimova.

Osy oqıǵaǵa qatysty óz kezeginde Aqtóbe ákiminiń orynbasary Rýzıa Aıdanova pikir bildirdi. "Biz Lepesovter otbasyna 2 bólmeli páterdi berdik, olar sońynda osy úıdi satyp ala alady. Onyń tórt balasy bar. Biraq biz úsh adamdy ǵana kórdik, ózi, kúıeýi jáne Maahabbatpen birge oqıtyn balasy. Biraq Lepesov qyzdy úıin paıdalanyp ketti dep daýlasyp jatyr. Sebebi sol úıdiń aldynda vıdeo túsirilgen. Biraq ol qyzǵa úıdi memleket bergen joq qoı, bıznesmen syılady. Bul árkimniń óz qalaýy. Árkim neni kimge syılaıtynyn ózi biledi. Al osy aıyptaýlarǵa keler bolsaq, bul otbasylardyń arasyndaǵy ózara daý", - dep málimdedi sheneýnik.

Aıta keteıik, osyǵan deıin Aqtóbede sý tasqynynan zardap shekken 10 jastaǵy qyz bılikke úndeý aıtqan bolatyn. Eshimovter otbasy sý tasqynynan baspanasynan aıyrylǵan edi. Sheshesi Turǵangúl Eshimovanyń aıtýynsha, kúıeýiniń júregi álsiz jáne ol úıiniń qırap qalǵanyn áli kórmepti. Basylymnyń málimetinshe, áıeldiń kenje qyzy Mahabbat № 36 mektebiniń tórtinshi synyp oqýshysy eken. Ol mektep formasynan, oqýlyqtarynan da aıyrylyp, tabıǵı apattan eseńgirep qalǵan. 

Keıin almatylyq kásipker Qaırat Qudaıbergen aty-jónin ataǵysy kelmegen bıznesmenmen birge sý tasqynynan zardap shekken aqtóbelik 10 jastaǵy qyzǵa baspana syılamaqshy bolǵan. Alaıda osy baspanany salýda olar qıyndyqtarǵa tap boldy. Syılanatyn úı de sý tasqyny bolýy múmkin degen aımaqqa jatqyzyldy. Alaıda bıznesmen 10 jastaǵy Mahabbatqa kóppáterli úıden úsh bólmeli páter syılady.