Mańǵystaý oblysynda belgisiz bir top qarýly adam bútindeı bir otbasyna oq jaýdyryp, oqıǵa ornynan qashyp ketken. Betin tumshalaǵandar tipti besiktegi 9 aılyq sábı, aıaǵy aýyr kelinshek pen ózge de balalardyń bolǵanyna da qaramaǵan, dep jazady Qamshy aqparattyq agenttigi 31 arnaǵa silteme jasap.
Úı ıesiniń aıtýynsha, kelgen basbuzarlardyń ishimdik ishkeni baıqalǵan. Belgisiz top músheleri úıge kirmegen,terezeden toqtaýsyz oq jaýdyryp, tas laqtyrǵan. Bul kezde úıde qyryqtar shamasyndaǵy otaǵasy, eki jasóspirim qyz, júkti kelini men qundaqtaýly sábı bolǵan. Buzaqylardyń biri uıaly telefonyn úıdiń mańynda túsirip alypty. Zardap shekkender birden Qaraqıa aýdandyq İshki ister bólimine shaǵymdanǵan. Aty-jónderi belgili bolǵan alty kúdikti áli ustalǵan joq.
«Ketip bara jatyp bandylardyń bireýi sotkasyn túsirip alǵan. Ol sotkany mılısıalar anyqtap, Ózenniń jigiti ekenin bilip otyr. Buryn sottalǵan. Biraq sonda da áli ustaı almaı otyr. Búgingi kúnge deıin eshkim ustalǵan joq. Ol jerde 7-8 er adam júrdi úıdi shyr aınalyp», - deıdi úı ıesi Sandýǵash Nilǵalıeva.
Sholýshy: Gúlim jaqan
