Búgin Qazaqstan men Fınlándıa arasyndaǵy dıplomatıalyq qarym-qatynastardyń ornaǵanyna 25 jyl tolyp otyr. Osyǵan oraı, Astanada arnaıy baspasóz máslıxaty ótti. Al QR Syrtqy ister mınıstri Qaırat Ábdiraxmanov óz áriptesine quttyqtaý xatyn joldady, dep jazady Qamshy aqparattyq agenttigi.
QazAqparattyń málimetinshe, baspasóz máslıxatyna qatysqan QR Syrtqy ister mınıstriniń orynbasary Roman Vasılenko eki el arasyndaǵy baılanystar jaıynda aıta kele, Fınlándıanyń Soltústik Eýropa elderi ishinde Qazaqstan ekonomıkasyna aqsha salyp jatqan iri ınvestor ekenin erekshe atap ótti. Onyń ınvestısıasy 300 mln AQSH dollarynan asyp otyr. «Qazirgi kezde Qazaqstanda 70-ten astam fın kompanıalary jumys istep jatyr. Olar energetıka, telekomýnıkasıa, kólik, logıstıka, taý-ken, aýyl sharýashylyǵy, óńdeý kásibi, turǵyn úı jáne taǵy basqa salalarda eńbek etip júr», - dedi Vasılenko.
Onyń aıtýynsha, qazirgi áriptestik odan da keńeıýi ábden múmkin. Sebebi Qazaqstan men Fınlándıa arasyndaǵy saýda-ekonomıkalyq yntymaqtastyq jónindegi úkimetaralyq komısıanyń jumysy jandana tústi. Komısıanyń sońǵy otyrysynda energetıka, bilim, aýyl sharýashylyǵy, kólik pen logıstıka boıynsha birneshe jumys tobyn qurý týraly sheshim qabyldandy. Eki eldiń bıznes joly da ózara tyǵyz baılanystarǵa óz úlesin qosyp keledi. Budan bólek, bilim men ınovasıalar salasyndaǵy qarym-qatynas nyǵaıyp jatyr. Máselen, sońǵy eki jyldyń ishinde Qazaqstannyń 20-dan astam ushqyshy Fınlándınyń azamattyq avıasıa mektebinde arnaıy daıyndyqtan ótti. Oǵan qosa, 100-den astam memlekettik qyzmetker óz biliktilikterin shyńdap qaıtty. Sondaı-aq, «Bolashaq» baǵdarlamasy aıasynda fın elinde bilim alyp júrgen jastar az emes.
Óz kezeginde Fınlándıanyń Qazaqstandaǵy Tótenshe jáne Ókiletti elshisi Ilkka Raısanen eki el arasyndaǵy dıplomatıalyq qarym-qatynastardyń damýyna joǵary baǵa berip, qazirgi baılanystardy áli de nyǵaıtý qajettigin jetkizdi. «Fınlándıa úshin Qazaqstan Ortalyq Azıaǵa jol ashatyn qaqpa ispetti. Biz de Qazaqstan úshin búkil Soltústik Eýropa aımaǵynyń qaqpasy bola alamyz dep senemin. Astanadaǵy EKSPO-2017 kórmesine qatysatynymyzǵa qýanyshtymyz. Sebebi dál osy jyly biz táýelsizdigimizdiń 100 jyldyǵyn, sondaı-aq eki el arasyndaǵy dıplomatıalyq qarym-qatynastardyń 25 jyldyǵyn atap ótip otyrmyz», - dep atap kórsetti Raısanen.
Baspasóz máslıxaty barysynda Vasılenko eki el arasyndaǵy dıplomatıalvq qarym-qatynastardyń 25 jyldyǵyna oraı mınıstr Qaırat Ábdiraxmanovtyń Fınlándıanyń syrtqy ister vedomstvo basshysy Tımo Soınıge arnaǵan quttyqtaý xatyn elshige tapsyrdy.
Aıta keteıik, Fınlándıanyń prezıdenti Saýlı Nınnıste Astanadaǵy EKSPO-2017 Halyqaralyq kórmesine kelýdi josparlap otyr.
Sholýshy: Gúlim Jaqan
