Almaty qalasy Áýezov aýdany prokýrorynyń kómekshisi Bekzat Bóshen 22 adam zardap shekken jantúrshigerlik jol apatynyń mán-jaıyn aıtyp berdi. Er adam "Gelendvagen" tizgininde bolǵan dep habarlaıdy Qamshy aqparattyq agenttigi Tengrinews.kz basylymyna silteme jasap.
"11 mamyrda tańǵy 08:00 shamasynda áıelimdi aýrýhanaǵa aparyp tastadym, ol jaqta áıelimdi rentgen sáýlesimen emdep jatyr. Qaterli isigi bar. Men eńbek demalysyndamyn, sol sebepti Saryaǵashqa baryp, demalýdy josparlap otyrǵanbyz. Men kólikti daıarlap, Raıymbek dańǵylynyń boıynda kóliktiń maıyn aýystyrdym", - deıdi prokýrordyń kómekshisi.
Sol kezde onyń áıeli qońyraý shalyp, tezirek kelýin suraǵan.
"Men oń jaqtaǵy kishkentaı shaǵyn kóshege burylaıyn dedim. Oń jaqta tosqaýyldap turǵandyqtan men ol kólikti ótkizip jiberdim, odan keıin avtobýs joq bolatyn. Janymda ulym otyrdy, ońǵa burdym. Ary qaraı júreıin degenimde oń jaqtan qatty soqqyny sezdim. Eki-úsh sekýndtan soń esimdi jıdym, ulyma qarasam ol qozǵalyssyz ań-tań bolyp otyr. Balamdy qolyma alyp, syrtqa shyqtym, adamdar júgirip keldi, olar meniń qolymnan balamdy alyp, jaqyn mańdaǵy dúkenge alyp kirdi. Ol qozǵalyssyz jatty, men oǵan alǵashqy kómek kórsettim. Ol esin jıa bastady, sol mezette jedel járdem keldi. Biz jedel járdemmen birge balany birinshi balalar aýrýhanasyna jetkizdik", - deıdi Beken Bóshen.
Beken Bóshenniń balasy kóliktiń aldyńǵy oryndyǵynda balalar kreslosynda otyrǵan.
"Ol ekide. Men burylǵan sátte avtobýs bolmaǵan. Oń jaqtan jeńil kóliktiń ótkenin bilemin, ony kórdim, oǵan jol berip, baıyppen ońǵa qaraı burdym, qarap edim, eshkim joq, osy kezde soqqy boldy. Oń jaqqa burylatynymdy bildiretin jaryqty qostym. Eshqandaı dabyl belgisin estimedim. Oń jaǵymda uıyqtap jatqan balamnyń ómirin esh ýaqytta qaterge tikpes edim. Ol qazir aýyr jaǵdaıda jansaqtaý bóliminde jatyr. Naqty aıta almaımyn, biraq 50-60 shaqyrym jyldamdyqpen kele jatqan avtobýs meniń kóligimdi 20 metrge deıin ushyryp, keıin baǵanǵa qatty jyldamdyqpen kelip soǵyspas edi. Sol ýaqytta sasyp qaldym", - deıdi prokýrordyń kómekshisi.
"Soqqy meniń balam otyrǵan jaqqa jasaldy. Artqy esik pen aldyńǵy tireýge soǵyldy. Soqqy bolǵan kezde kreslodan ushyp ketti. Qazir balamnyń jaǵdaıyn ózim de bilmeımin. Aparyp tastaǵannan keıin qylmystyq qýdalaý organdary meni alyp ketti, túsinik berdim", - dedi ol.
Prokýrordyń kómekshisi otyrǵan "Gelendvagen" basqa adamnyń atynda eken.
"Men júrgizgen kólik baýyrymnyń atynda. Ol kezinde óziniń dosynan satyp alǵan. Baýyrymnyń atyna jazylǵan. Qazirgi ýaqytta ózim Mitsubishi Galant kóligimen júremin. Sol kúni men Shymkentke shyǵyp ketpekshi bolǵan edim, Mitsubishi Galant kóligimen barý qıyn bolǵandyqtan, odan kóligin surap alǵan edim. Baýyrym bazarda jumys isteıdi. Ol - bıznesmen", - dep túsindirdi ol kóliktiń kimdiki ekenin.
Beken Bóshenov 2-17 mamyr aralyǵynda eńbek demalysynda ekenin aıtty.
"Bir ǵana aıta alatynym: Qazaqstan Respýblıkasynyń azamattary, meni keshirińizder! Mundaıdy qalaǵan joqpyn, avtobýsty shyn máninde baıqamadym. Onyń ústine oń jaǵymda balam otyrdy, balamnyń ómirin eshýaqytta qaterge tikpeıtin edim. Keshirińizder! Zardap shekkenderge barynsha kómektesemin", - dedi prokýrordyń kómekshisi.
Aıta keteıik, qazirgi ýaqytta Almaty polısıasy QR Qylmystyq kodeksiniń 345-babynyń 1-bóligi boıynsha ("Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy") sotqa deıingi tergeý jumystaryn júrgizip jatyr. Sonymen qatar, 15 aılyq eseptik kórsetkish mólsherinde (35 000 teńge) aıyppul salýǵa jáne bir jyl merzimge kólik quralyn basqarý quqyǵynan aıyrýǵa ákep soǵatyny kórsetilgen.
"Conymen qatar, ishki tergeý jumystary bastaldy jáne biz osy jol-kólik oqıǵasyna qatysty ádil zertteý júrgizemiz dep kepil beremiz", - dedi bas prokýratýradaǵylar.
Al osyǵan deıin avtobýspen soǵysqan Mercedes-Benz G-klass tizgininde Almaty prokýratýrasynyń qyzmetkeri bolǵany anyqtalǵan edi. "Shynymen de Mercedes-Benz G-klass tizgininde Almaty prokýratýrasynyń qyzmetkerleriniń biri bolǵan, ol 2017 jyldyń 2 mamyrynan bastap eńbek demalysynda júrgen", - dep habarlaǵan edi Almaty prokýratýrasyndaǵylar. Sondaı-aq, keıinirek Gelandewagen men avtobýs soǵysqan sát túsirilgen vıdeo paıda bolǵan edi.
Qazirgi ýaqytta Almaty prokýratýrasynyń ishki qaýipsizdik qyzmeti qyzmettik tekseristi bastap ketti. Sonymen qatar, jol-kólik oqıǵasynan zardap shekken eki jasar qyz, qalalyq quzyrly organnyń málimetinshe, jol talǵamaıtyn kóliktiń salonynda bolǵan. Onyń jaǵdaıyn dárigerler aýyr dep baǵalaǵan, ol keýde tusynan jaraqat alyp, bassúıek mıy zaqymdalǵan.
Eske salaıyq, búgin jol-kólik oqıǵasy Raıymbek dańǵylynyń boıynda Tilendıev kóshesimen qıylysqan tusta boldy. Kóptegen kýágerlerdiń aıtýynsha, № 63 baǵytynda júretin qoǵamdyq kóliktiń júrgizýshisi shyǵys baǵytta avtobýstarǵa arnalǵan arnaıy jolaqpen kele jatqan. Osy baǵytta kele jatqan Mercedes-Benz G-klass Tilendıev kóshesine jetpeı Potemkın kóshesine ótý úshin dereý burylǵan. Soǵysý saldarynan Mercedes-Benz G-klass 20 metrge ushyp ketken, al jolaýshylar avtobýsy baǵanǵa soǵysqan. Aldyn ala málimetter boıynsha, jol apatynyń saldarynan 23 adam zardap shekken, onyń ishinde avtobýstyń da, jeńil kóliktiń de júrgizýshisi bar. Barlyǵy aýrýhanaǵa jetkizilgen.
