Qazaqstan Respýblıkasynyń Memlekettik hatshysy Gúlshara Ábdiqalyqova «Ardagerler uıymy» respýblıkalyq qoǵamdyq birlestiginiń qurylǵanyna 30 jyl tolýyna arnalǵan saltanatty jınalysqa qatysty, dep habarlaıdy Qamshy aqparattyq agenttigi Aqordanyń baspasóz qyzmetine silteme jasap.
Ardagerler uıymy 1987 jylǵy 21 naýryzda qurylǵan. Birlestik quramynda 1 mln 845 myń soǵys jáne eńbek ardageri bar. «Halyq qaharmany» jáne Qazaqstannyń Eńbek Eri ataǵyn ıelengen 17 ardager, 2 Keńes Odaǵynyń Batyry, 115 Sosıalısik Eńbek Eri uıymnyń maqtanyshtary bolyp sanalady.
Saltanatty jınalysqa Ardagerler uıymynyń ortalyq keńesiniń tóraǵasy B. İzmuhambetov, elimizdiń barlyq óńiriniń soǵys jáne eńbek ardagerleri, Parlament Májilisiniń depýtattary, memlekettik organdar, jurtshylyq jáne buqaralyq aqparat quraldary ókilderi qatysty.
Gúlshara Ábdiqalyqova quttyqtaý sózinde ardagerlerge qamqorlyq jasaý, olardyń turmys deńgeıin arttyrý memlekettiń áleýmettik saıasatynyń basty basymdyǵynyń biri bolyp sanalatynyn atap ótti.
Memlekettik hatshy 2017 jylǵy 1 shildeden bastap Prezıdenttiń tapsyrmasy boıynsha zeınetaqy 2016 jylmen salystyrǵanda 20%-ǵa ósetinin aıtty. Budan bólek, negizgi zeınetaqyny taǵaıyndaý jańa ádisteme boıynsha júzege asyrylyp, onyń mólsheri zeınetaqy júıesine qatysý ótiline baılanysty bolmaq. Bul sharalar 2018 jyly negizgi zeınetaqy kólemin 2017 jylmen salystyrǵanda 1,8 ese ulǵaıtýǵa múmkindik beredi.
Memlekettik hatshy respýblıkalyq birlestiktiń Qazaqstan Respýblıkasynyń qalyptasýy men damýyna qosqan úlesin aıryqsha atap ótti.
Sońynda Memlekettik hatshy el Prezıdentiniń «Bolashaqqa baǵdar: rýhanı jańǵyrý» atty baǵdarlamalyq maqalasynda qoıylǵan mindetterdi iske asyrýǵa ardagerler belsendi túrde atsalysatynyna senim bildirdi.
Saltanatty jıyn barysynda ardagerler Nursultan Nazarbaevtyń udaıy kórsetip kele jatqan qamqorlyǵy úshin alǵys bildirdi. Olar Qazaqstanda saltanat quryp otyrǵan beıbitshilik, birlik jáne kelisimge jetkizgen Memleket basshysynyń kóregen ári syndarly saıasatyn biraýyzdan qoldaıtynyn aıtty.
Sholýshy: Gúlim Jaqan
