Er adam múgedek adamdy baýyzdap, aıaýsyz pyshaqtap tastaǵan, - dep habarlaıdy Qamshy aqparattyq agenttigi Tengrinews.kz basylymyna silteme jasap. 

Aýyr qylmysty jasady degen kúdik múgedektiń 30 jastaǵy kórshisine kelip otyr. Ol buǵan deıin buzaqylyq oı-nıetpen densaýlyqqa adam ómirine qaýip tóndiretin aýyr zıan keltirdi degen qylmyspen sottalǵan. Alaıda er adam merziminen buryn shartty túrde bostandyqqa shyqqan.

"Al osy joly taǵylyp otyrǵan aıyptarǵa qaraǵanda, kúdikti bastapqyda múgedekti emes, onyń aǵasyn óltirýdi oılaǵan. Biraq úıde aǵasy bolmaı qalyp, qaskóı múgedekten aǵasynyń qaıda ekenin surastyra bastaǵan. Osydan keıin kóńilindegi oılaryn jetkizgen. Aǵasyna jaqtyrtpaýshylyq oı-nıeti bar ekenin jáne óltirgisi keletinin aıtqan. Buǵan múgedek kelispeı, aǵasyna tıispeı, ornyna ózin óltire salýdy suraǵan. Osy kezde qaskóı beline jasyryp alyp kelgen asqana pyshaǵyn shyǵaryp, eki aıaǵy joq adamdy baýyzdap, keıin pyshaqtaǵan. Alǵan jaraqatynan múmkindigi shekteýli jan oqıǵa ornynda qaza tapqan. Kúdikti pyshaqty ózimen birge alyp ketken", - delingen qylmystyq istiń materıaldarynda. 

Tergeý organdarynyń málimetinshe, sottalýshyǵa qatysty sotqa deıingi sharalar júrip jatyr. İs materıaldary Qaraǵandy oblystyq qylmystyq ister jónindegi aýdanaralyq mamandandyrylǵan sotyna kelip túsken. Bas sot otyrysynyń qashan ótetini ázirshe belgisiz.