Baýyrjan Baıbek ákimder reıtıńinde kósh bastady dep habarlaıdy Qamshy aqparattyq agenttigi sayasat.org portalyna silteme jasap.

Ákimder reıtıńisin anyqtaǵan saýalnama 2017 jyldyń 1 mamyrynan 7 mamyryna deıin ótkizilgen. Oǵan 26 sarapshy, bloger, saıasattanýshy, polıttehnolog, qoǵam qaıratkerler qatysqan.  

Sáýir aıynyń reıtıńinde Almaty ákimi Baýyrjan Baıbek kósh bastap tur. Sáýirde eń jas ákim qala qurylysy, jol jóndeý, ınjenerlik komýnıkasıa máselelerimen belsene aınalysqan. Sondaı-aq,ol bolat qubyrlar zaýytyn ashty.

 Sarapshylardyń pikirinshe, Baýyrjan Baıbek syn sadaǵyna kóbirek ilingen. Ol ınvestorlar kúnin ótkizip, Sıngapýr men Japonıadan delegasıa qabyldaǵan. Eýropa qaıta qurý jáne damý bankiniń basshylyǵymen kezdesti.

Ekinshi orynǵa Qyzylorda oblysynyń ákimi Qyrymbek Kósherbaev  taban tiredi. Kórshiles oblystardy sý alyp jatqanyna baılanysty Q.Kósherbaev sý resýrstary komıteti basshysy Islam Ábishevpen birlese otyryp, birinshi kezekte qaýip tóndiretin aımaqtardy baqylaýǵa aldy. Áýeden baqylaý jumystarynyń nátıjesinde Úkimette kontrregýlátor salý máselesi kóterildi. Sondaı-aq, Qyzylorda oblysynyń ákimi «Maıkrosoft» kompanıasymen kelisimge qol jetkizdi. Endi oblys stýdentteri azýly kompanıada bilim alatyn boldy.

Ákimderdiń reıtıńinde Astana ákimi Áset Isekeshov úshtikke ilindi. Respondentter Áset Órentaıulynyń mansaby endigi kezekte EKSPO-nyń qalaı ótetindigimen tikeleı baılanysty ekendigin aıtty. Astana ákimi kúzge deıin tyǵyz rejimde jumys jasaıtyn bolady.

 Tórtinshi orynǵa toqtaǵan Aqtóbe oblysynyń ákimi Berdibek Saparbaevtyń sáýirdegi eń basty áreketin aıtsaq, ol Orynbor oblysyna Aqtóbeniń ınvestısıalyq múmkindigin tanystyryp keldi. Sondaı-aq, ákim «Qarashyǵanaq  Petrolıým Opereıtıng» kompanıasy men qazaqstandyq servıstik kompanıalardyń arasyndaǵy áriptestikti nyǵaıtý úshin kelissózder júrgizdi. Aıta ketý kerek, kóktemde bolǵan sý tasqyny Saparbaevtyń da mansabyn shaıqaǵany belgili. Oblys ákimi qalyptasqan jaǵymsyz kózqarasty azyq-túlik pen dári-dármektiń baǵasyn arzandatý arqyly jumsartýǵa tyrysty. Berdibek Máshbekuly úı-jaılaryn sý alǵan turǵyndarmen kezdesip, muń-muqtajyn tyńdaǵan jalǵyz ákim boldy. 5-shi oryndy mise tutqan Almaty oblysynyń ákimi Amandyq Batalov Premer-Mınıstrge Elbasynyń tapsyrmalaryn oryndaý boıynsha esep bergeni belgili. Premerdiń tyǵyz jumys kestesi kórsetkendeı, jergilikti basshylyqtyń aıtary mol bolǵanǵa uqsaıdy.

Sondaı-aq, Taldyqorǵan  turǵyndary alǵash gazǵa qosyldy. A.Batalov Aqsý qant zaýytynyń qurylysynan bastap mamandardy ornalastyrý máselesine deıin ózi qadaǵalap otyr. Atalǵan aımaqta memlekettik-jekeshelik áriptestik aıasynda 11 joba júzege asyp keledi.  Altynshy orynǵa turaqtaǵan Shyǵys Qazaqstan oblysynyń ákimi Danıal Ahmetov kópshilikke Semeıdi kóterý týraly ýáde bergen edi. Oblys ortalyǵynyń kóp problemalary sheshile bastaǵanyn aıta ketý kerek. Respondentter qoǵamdyq kóliktegi jol júrý baǵasyna baılanysty daý-janjaldy da eskerip ótti. D.Ahmetov jol aqysyn tek avtobýs parkterin monopolıadan shyǵaryp joldardy jóndegen soń ǵana kóterýge bolatynyn aıtqan bolatyn. Sáýirde D.Ahmetov aýrýhanalardy jabdyqtaý, týrısik ındýstrıany damytý, sútti mal sharýashylyǵyn damytý máselelerimen aınalysty.

8 orynǵa taban tiregen OQO ákimi Janseıit Túımebaev Memleket basshysymen kezdesken bolatyn. Kezdesý barysynda Elbasy aımaqtaǵy negizgi problemalardy basa kórsetti.

 OQO ońtústiktegi iskerlik klımatty qalyptastyrý boıynsha úzdik úshtikte eken. Aımaqtyń negizgi áleýmettik-ekonomıkalyq kórsetkishteri oń dınamıkany kórsetip otyr. Mańǵystaý oblysynyń ákimi Eraly Toǵjanov 10 orynǵa laıyq dep tanyldy. Memleket basshysynyń oblysqa sapary sátti ótti. Reıtıńtiń ózge de jańa qatysýshylary Soltústik Qazaqstan, Qaraǵandy, Aqmola oblystarynyń basshylary Málik Myrzalın (10-oryn), Qumar Aqsaqalov (13-oryn), Ermek Qoshanov (15-oryn) qyzmetteriniń alǵashqy aıynda  úlken synǵa tap boldy. Oblys ákimderi sý tasqynynan zardap shekken turǵyndardyń máselesin sheshýmen aınalysty. Sarapshylar aıtqandaı, tasqyn sý olarǵa aldyńǵy ákimderden muraǵa qalǵan problema. Alaıda, endi olar shırap jaqsy krızıs-menedjerlerge aınalady. Qostanaı oblysynyń ákimi Arhımed Muhambetov (16-oryn) kóktemgi sý tasqynymen shama-sharqy jetkenshe kúresti. Endigi kezekte oǵan tasqyn zardabyn joıý arqyly upaı jınaý kerek. 

Sholýshy: Nazerke MUSA