14 mamyrda áleýmettik jelide jarıalanǵan tómendegi jazba qatty talqylandy. 200 shamasyndaǵy adam bólisken jazba Mańǵystaý oblystyq densaýlyq saqtaý basqarmasy basshysy qyzmetin atqarǵan Maral Qadyr týraly. Ol atalǵan qyzmetke 2016 jyldyń tamyz aıynda taǵaıyndalǵan bolatyn. Onyń aldynda uzaq jyldar oblystyń bas sanıtary qyzmetin atqarǵan. Maral Qadyrdy 5 mamyrda Aqtaý qalalyq soty 7 jylǵa bas bostandyǵynan aıyrdy.
***
Femıdanyń kózine aq tústi! Aqtaý qalalyq sotynyń sýdıasy M.Kenjalıev oblystyq densaýlyq saqtaý basqarmasynyń eks-basshysy Maral Qadirdi 7 jyl bas bostandyǵynan aıyrýǵa úkim shyǵardy. 7 jyl! Jetim qyz, jesir áıel, jalǵyzbasty anaǵa jeti jyl!!!
Al, "Astana-EKSPO" ulttyq kompanıasynyń 214 mln qarjysyn jymqyrdy dep aıyptalǵan (erketotaı balasynyń kisi óltirgen qylmysyn qospaǵanda) Q. Úsenov raqymshylyqpen bosap shyqty. Buny bir dep bilińiz. Horgos basshysy V.Nı 1 mln dollar paramen ustalyp, kózapara qutylyp ketti. Bul eki. 4 000 000 teńge para surap tutylǵan Ahmetalıeva da qalalyq sottan 12 jylǵa kesilip turyp, oblystyq sottyń sheshimimen 5 jylǵa jeńildetip aldy. Jemqorlyqpen 1jyl 6 aıǵa sottalǵan Qulmaǵambetov 2000 EAK aıyppulǵa ózgertip qutyldy. Aqsha bopsalaǵan Derbisova 3 jyl merzimin shartty jazaǵa aýdaryp aldy. 1000 000 teńge bopsalaǵan Demesinova men Túlekbaeva isi de jeńil jazamen aıaqtalǵan. Al, bar -joǵy 45 000 teńgelik (300 dollar) Maral Qadirge kelgende mártebeli sot zańqoı ám qatal! 7 jyl!
Ómir boıy memqyzmetke tıym! Múligin kámpeskeleý! Qaıdasyń, soqyr Femıda?! Osy aptada osy istiń úkimshisi M.Kenjalıev arnaıy brıfıń berdi. Sottyń ashyq ótkenin, Maraldyń jaqtastary vıdeodálelderdi kórip, únsiz ǵana keliskendigin aıtty. Joq! Olaı emes. Shaǵyn sot zalyna syımaı qalǵan halyq, sot úkimin oqyǵanda kúńirenip ketken kópshilik, talyqsyp qulaǵan ana, qulyn daýysy shyrqyraǵan bala... Olar sot sheshimimen esh kelisken joq bolatyn. Ortalyqtan kelgen psıho-fılologıalyq saraptama Maraldyń qylmysqa qatysyn dáleldeý múmkin emes dep shyqqan. Ol esepke alynǵan joq! Ustaý kezinde Maraldyń aqsha salynǵan konvertti óz qolymen aıqaılap, jekirip, qorqytyp sómkesine saldyrtyp, sosyn kamerany qosqandyǵy týraly deregi esepke alynǵan joq! Birinshi kýáger bergen 100 myń teńgeniń áriptestiń qaıtqan anasynyń janazasyna ujymnyń jınaǵan qarjysy ekendigin áriptesteriniń ózi aıtyp ta, jazyp ta berse de esepke alynǵan joq! Eki kýágerdiń de Maral tarapynan kórgen qysymy ózderiniń kásibı biliktiligine qatysty qyzmettik talap ekendigi qanshama jumystyq hattamalarmen dáleldense de esepke alynǵan joq! Sot otyrystarynda beınedálelderdiń montajdalyp, ózine qarsy paıdalanylǵandyǵyn, ózin aqtap alatyn dáleldi tustarynyń qıylǵanyn aıtsa da esepke alynǵan joq! Jalǵyz uly jan dosyn sýdan qutqaram dep ózi de teńizge batyp ólgen azaly ana ekendigi esepke alynǵan joq! Sol oqıǵadan psıhologıalyq zaqym alǵan jalǵyz qyzdyń qaraýsyz, panasyz, anasyz qalǵandyǵy esepke alynǵan joq! Jalǵyzbasty ana ekendigi esepke alynǵan joq! Bul qyzmetke burynǵy oblys ákimi 8 aı kóndirip ákelgen bilikti tájirıbeli maman ekendigi esepke alynǵan joq! Buǵan deıingi basshylar aýzynan aq maı aqtarylyp, pálenbaı úı, qymbat kólikpen kóshe almaı qalǵanynda ústine qyltanaq ilmeı, úsh bólmeli úıde qanaǵatpen ómir súrip, 5 aıǵa jetpeıtin qyzmet ishinde jemqor bolyp ketýge ary da, ýaqyty da jetpeıtindigi esepke alynǵan joq! Memaıyptaýshy prokýratýra 12 mln teńge aıyppul jazasyn surasa da esepke alynǵan joq! Arasha suraǵan el-jurt, aqsaqaldar, el aǵalary, ujym- áriptesteri bári-bári esepke alynǵan joq! Sen soqyr ǵana emes, tasjúrek ekensiń ǵoı, Femıda!..
P.S: Maral Qadirdiń oblystyq sotqa apelásıalyq shaǵym túsirýine az ǵana ýaqyty qaldy. Advokattary qamsyz emes bolar. Áıtse de, "ákemdi alǵan ajaldan men de qorqam" degen eken bireý. Qorqamyz jáne úmittenemiz...Tileımiz! Jalpy Maraldyń qysqa ǵana basshylyq qyzmetinde kimderdiń "aıaǵyn basyp" ketkeni, kimderdiń maıshelpek ómirden aırylǵysy kelmegenin qazir sezbesek te keıin sezetin bolamyz. Para alýshy bar da berýshi jazasyz shytyrman istiń de kýágerleri japqan jalalaryn óz arynyń tarazysyna tarta tursyn. Myna irip-shirigen qoǵam olarǵa da bir jalaqordy jolyqtyrar. Nıetterinen tapsyn deımiz be, álde... Já, ázirge eshkimdi qarǵamaıyq, qaralamaıyq. Qatal úkim kesýshi sýdıany da. Ol da zańǵa súıengen bolar. Biraq!.. Tek, Mártebeli Zańnyń Adam ıgiligi úshin jasalatyndyǵyn, bárimizdiń de ADAM bolyp qalýymyzdy shyn tileıikshi...
