«Kók jaılaýda qurylys bastalyp ketti. Dostar, tabıǵaty tamasha mekendi qorǵaıyq! Jerimizdi, talymyzdy, ormanymyzdy urpaǵymyz úshin saqtaıyq! İske kósheıik!»
Dál osyndaı mazmundaǵy úndeý áleýmettik jelide taralyp ketti. Taralýyna sebep te kóp. Almaty degende kez-kelgen adamnyń kóz aldyna birinshiden İle-Alataýy eske túsedi emes pe? Qalyń orman, jasyl alqap, jaıqalǵan gúl, eń bastysy ıisi muryn jaratyn almalar men aporttar. Iá, almatylyqtardyń, tipti qazaqstandyqtardyń maqtanýǵa turarlyq eń ǵajap jerleriniń biri Almatynyń alyp taýlary. Jerimizdiń kórkem mekenin bári kórsin degen nıetpen 1996 jyly 22 aqpanda QR Úkimeti Qaýlysymen İle-Alataýynyń memlekettik ulttyq tabıǵı parki qurylǵan. Atalmysh park Ortalyq Azıadaǵy erekshe qorǵalýy tıis tabıǵı aımaqtardyń ishindegi eń irisi. Qorǵalýy tıis edi, biraq jerine kóz suqqandardyń qarasy kóbeıipti.
Feısbýk qoldanýshysy Saltanat Táshimova paraqshasyna taý basynda ornalasqan Kók jaılaýdyń múshkil háli jaıynda vıdeo salǵan eken.
«İle-Alataýy ulttyq saıabaǵynyń jerinde qurylys jumystary bastaldy. Bul qurylys túbegeıli zańǵa qaıshy ekenin aıta ketken jón. QR Qylmystyq kodeksiniń babyna sáıkes is qozǵalýy tıis. Jalpy, qurylysshylar Qyzyl kitapqa engen 467 sıvers alma aǵashyn joıdy, 22000 Tán-SHan shyrshalaryn shaýyp tastady. Eldi mekende sırek ósetin ósimdikterdiń kózi joıyldy. Halyq bul qurylystyń túbinde jemqorlyq jatqanyn aıtyp shýlasýda. Qurylystyń basy qasynda salyq tóleýshiler júrgen kórinedi», delingen Feısbýk qoldanýshysynyń jazbasynda.
Qamshy aqparattyq agenttiginiń tilshisi bul úndeýdi tolyǵymen qoldap, kórermen nazaryna usynady. Tabıǵattyń ásemdigin qorǵaý, taza aýasyn saqtaý 10 shaqty adamnyń qolynan kele qoımas, úndeý barsha qazaqstandyqtarǵa arnalady. Ár azamat óz eline tıesili jerdiń ár buryshy úshin jaýapty bolýy tıis. Ózi úshin de, óskeleń urpaq úshin de...
Sholýshy: Gúlim Jaqan
