Máskeýde Reseıdiń Úlken teatry men «Astana Opera» arasynda yntymaqtastyq týraly Memorandýmǵa   qol qoıyldy. Atalǵan shara Qazaqstannyń Reseıdegi Elshiliginiń muryndyq bolýymen júzege asty dep habarlaıdy Qamshy aqparattyq agenttigi Reseıdegi Qazaqstan elshiligine silteme jasap.

Qujatqa Reseı Úlken teatrynyń bas dırektory Vladımır Ýrın men «Astana Opera» dırektory Ǵalym Ahmedıarov qol qoıdy.

          Mundaı tyń ózgeris  elimiz táýelsizdik alǵaly tuńǵysh ret júzege asyp otyr. Óıtkeni osy baılanys arqyly ártistermen, oryndaýshy ujymmen almasý, ózara keńes berý kómegin usyný, gastróldik saparlardy uıymdastyrý, birlesken shyǵarmashylyq jobalardy uıymdastyrý josparlanýda.

«Buryn mádenı sharalarmen almasý sheńberinde qos eldiń ártisteri Astana jáne Máskeý sahnalarynda óte sırek óner kórsetetin. Endi bul úrdis udaıy júrgiziletin bolady. Sondaı-aq,  álemniń úzdik teatrlarynyń birimen jasalǵan bul memorandým úlken jetistik ekenin, ártisterdiń keleshegine jol asha otyryp, qazaq mádenıetine jańa serpin bolatynyn aıta ketý kerek», - deıdi «Astana Opera» dırektorynyń orynbasary Aleksandr Sovostánov.

Taraptar qol qoıylǵan qujattyń aıasynda shyǵarmashylyq toptar arasynda kóptegen qajetti de paıdaly sharalar uıymdastyrýǵa bolatynyna senim bildirdi.