Elbasy Nursultan Nazarbaev óziniń «Bolashaqqa baǵdar: rýhanı jańǵyrý» atty maqalasynda qazaq tilin birtindep latyn álipbıine kóshirý jaıyn aıtqan edi. Úkimetke jańa álipbıge kóshýdiń naqty kestesin jasaýdy tapsyrǵan.

Qazir bul baǵytta biraz sharýa qolǵa alyndy. Árıne, eski tájirıbemiz de eskeriledi.

Almatydaǵy Prezıdent Arhıvi óz qorynda saqtalǵan latyn grafıkasyndaǵy qujattardy jarıalady, dep habarlaıdy Habar arnasy. Qujat arab álipbıinen latyn grafıkasyna aýysqan kezeńnen syr shertedi. 9 ǵasyr boıy Qazaqstanda arab álipbıi qoldanylyp keldi. Tek 1929 jyly 7 tamyzda «Birtutas túrki alfavıtin» engýzi týraly qaýly qabyldanady. Al 12 jyldan keıin qazaq jazýyn kırıllısaǵa aýystyrý týraly zań shyqty.

«Bul jerde qujattarmen qatar sol ýaqytta Qazaqstan baspalarynan shyqqan latyn álippesindegi kitaptar bar. Kórnekti jazýshymyz Muhtar Áýezovtiń Aıtbaı Hangeldınniń «Dýdaraı» operasyna jazǵan lıbrettosyna bergen pikiri, syny osynda keltirilgen. Ol da latyn álippesimen jazylǵan bolatyn», – dedi QR Prezıdenti arhıviniń dırektory Borıs Japarov.

Elbasy maqalasynda latynshaǵa kóshýdiń tereń máni bar ekenin jetkizdi.

«Bul jańa tehnologıalyq ortanyń, ǵylym men bilim berý prosesiniń erekshelikterine baılanysty».

Memleket 2025 jyldan bastap latyn álipbıine kóshýdi josparlap otyr. Osy jyldyń sońyna deıin qazaq álipbıiniń jańa grafıkadaǵy biryńǵaı nusqasy qabyldanýy tıis. Al 2018 jyldan bastap jańa álipbıdi úıretetin mamandar men orta mektepterge arnalǵan oqýlyqtardy daıyndaý qolǵa alynady. 

Sholýshy:  Gúlim Jaqan