Sońǵy ýaqytta Qaraǵandynyń ortalyq kóshesinde turatyn jurt dalaǵa shyqsa jaǵymsyz ıiske tap bolyp júr. Qalanyń bir jaǵynan maldyń eti men jún- jurqanyń borsyǵan ıisi shyqsa, kelesi jaǵynan káriz júıeniń ıisi múńkıdi, dep habarlaıdy Qamshy aqparattyq agenttigi abctv.kz basylymyna silteme jasap.
Muny jurt san-saqqa júgirtýde. Bireýler jaǵymsyz ıis qalanyń syrtyndaǵy kárizdik qaldyqtardy tazartý jelisinen keledi dese, kelesi top Dýbovkadaǵy shoshqa ósiretin kásiporynnan shyǵady dep topshylaıdy. Qolqany qabatyn ıis Qaraǵandy da byltyr paıda boldy. Búginde qala turǵyndary dalada muryn tyrjıtyp júrýge májbúr bolyp otyr. Al jergilikti bılik bul máselege bas qatyryp otyrǵan joq.
Turǵyndar tunshyǵyp júr
Qaraǵandynyń dál janynda ornalasqan Kırov shahtasy aýdanyndaǵy 19 shahta dep atalatyn eldi meken turǵyndary eki apta boıy sasyq ıiske tunshyǵyp jatyr. Munda jurt aýzy-murnyn tumshalap júretin jaǵdaıǵa jetken. Turǵyndardyń aıtýynsha, eldi mekende shybyn shirkeı men egeýquıryq qaptap ketken.
Qarap otyra berse istiń nasyrǵa shabatynyn túsingen jurt sasyq ıistiń qaıdan shyǵyp jatqanyn anyqtaýǵa kirisken. İzdeý jumystaryn uıymdastyryp júrip, aǵashtardyń arasynan 80-ge jýyq qapqa salynǵan taýyq súıekterin tapqan.
«Sasyq ıistiń osy jerden kelip jatqanyn birden túsindik. Úıimizdiń mańynda nelikten shybyn-shirkeıdiń qaptap ketkeni de belgili boldy. Qazir shybynnan bir, egeýquıryqtan bir qorqyp otyrmyz. Balalarymyzǵa juqpaly aýrý juqpasa eken degen qorqynyshymyz da bar», – dep qynjyldy aýyl turǵyny Qarlyǵash Mamyrbaeva.
Bul jerge taýyq súıekteriniń qaldyǵyn kimniń tastap ketkeni belgisiz. Alaıda taýyq etin súıeginen ajyratyp, ónim daıarlaıtyn júgensiz kásipkerdiń isi ekeni aıdan anyq.
Turǵyndar shaǵymdana salysymen veterınarlyq stansıanyń mamandary kelip, sasyp jatqan taýyq súıekterin qalanyń syrtyna shyǵaryp, kómip tastady. İzinshe mamandar dızınfeksıalaý sharasyn uıymdastyrdy.
«Halyqqa kesirin tıgizetin áreketti eshkim quptamaıdy. Qalanyń syrtynda maldyń ólekselerin, terilerin tastaıtyn arnaıy mal qorymy bar. Sol jerge aparyp tógý kerek. Bul úshin aqy alynbaıdy. Mal qorymyn tıisti jaǵdaıda ustap turý úshin búdjetten qomaqty qarjy bólinedi», – deıdi Qaraǵandy qalasy veterınarıa bóliminiń basshysy Erjan Beketbaev.
Dál qazir etin sydyryp alyp, súıegin shashyp ketken adam qaldyqty qala syrtyndaǵy mal qorymyna aparýǵa eringen bolý kerek degen boljam jasalyp, polısıa qyzmetkerleri taýyq etin óndiretin kásiporyndardy tekserýge kiristi.
Mundaǵy maqsat qaldyqty kóringen jerge tastap, jurtty shýlatyp júrgen júgensizdi jazaǵa tartý. Al Qaraǵandynyń ortalyǵynda múńkip turǵan jaǵymsyz ıis taýyq súıeginen emes ekeni anyq. Óıtkeni bul ıistiń qolqany qaýyp turǵanyna bıyl ekinshi jyl.
