QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdıasy túsirgen «Mıry Morısa Sımashko» derekti fılmi ústimizdegi jyldyń 15 men 17 mamyr aralyǵynda ótken Polsha Halyqaralyq festıválinde «Eń úzdik derekti fılm» júldesine ıe boldy.
Qazaqstandyq rejıser Aleksandr Golovınskıı túsirgen derekti fılm Uly Otan soǵysynyń ardageri, Qazaqstannyń halyq jazýshysy, Qazaqstan Prezıdenti beıbitshilik pen rýhanı tatýlyq syılyǵynyń laýreaty (İ.Esenberlınniń «Kóshpendiler» trılogıasyn orys tiline aýdarǵany úshin)
Morıs Sımashkonyń ómiri men shyǵarmashylyǵyna arnalǵan.
Osyǵan deıin atalmysh fılm Máskeýde ótken 19-shy DetectiveFest Halyqaralyq shytyrman oqıǵaly fılmder festıvalinde arnaıy júldege, sondaı-aq «Vmeste» XVII Halyqaralyq telekınoforýmda «Lıteratýrnaıa gazeta» basylymynyń atynan «Ortalyq Azıadaǵy jańa tarıhı roman mektebiniń negizin salýshylardyń biri jáne maıdanger ómiriniń beımálim paraqtaryn ashqany jáne sheberligi úshin» arnaıy júldemen marapattalǵan.
Álemniń táýelsiz kınematografısterin qoldaýǵa baǵyttalǵan Polshanyń Halyqaralyq kınofestıvali onlaın túrde ótedi. Festıvál sheńberinde kórkem, derekti, anımasıalyq jáne qysqametrajdy fılmder de baq synaıdy.
Sonymen qatar, QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen «Senim jolynda» atty derekti fılm Reseıdiń Sevastopol qalasynda ótken XIII Halyqaralyq «Pobedılı vmeste» atty derekti fılmder jáne telebaǵdarlamalar festıvalinde Djemma Fırsova atyndaǵy «Úzdik áleýmettik-fılosofıalyq televızıalyq jumys» júldesine qol jetkizdi.
Rejıser Ásıa Baıǵojına túsirgen «Senim jolynda» fılmi qoǵamymyzdaǵy ózekti máselelerdiń biri – din jolyndaǵy adasýshylyq týraly baıandaıdy.
«Pobedılı vmeste» festıvaliniń baǵdarlamasyna qatysýǵa 24 memleketten (Reseı, Avstrıa, Armenıa, Belarýs, Belgıa, Bolgarıa, Ulybrıtanıa, Grýzıa, Germanıa, Irlandıa, Qazaqstan, Qytaı, Polsha, Ýkraına, Chehıa, Fransıa, Estonıa jáne t.b.) bar joǵy 250 fılm úmit bildirgen eken. İrikteý komısıasy 16 elden 65 fılmdi tańdap alǵan eken.
Aıta ketsek, belgili kınorejısser, senarıst, «Qazaqfılm» kınostýdıasynyń prezıdenti Baqyt Qaıyrbekov derekti fılmder baǵdarlamasynyń halyqaralyq qazylar alqasynyń quramynda boldy. Esterińizge sala ketsek, rejıserdiń «316-á strelkovaıa» derekti fılmi 2007 jyly osy festıválde Bas júldeni jeńip alǵan bolatyn. Baqyt Ǵafýulymen birge festıváldiń úzdigin anyqtaǵan qazylar alqasy: aktrısa Natalá Gagına (Reseı), senarıst jáne synshy Tatána Iensen (Reseı), prodúser Natalá Ivanova (Reseı), rejıser jáne prodúser Ý Szán (Qytaı).
«MORIS SIMASHKONYŃ ÁLEMİ»
Rejıseri: Aleksandr Golovınskıı
Senarı avtory: Sergeı Rýsakov
Operatory: Sergeı Kosmanev
Kompozıtorlary: Farhat Ibragımov jáne Ádil Baıysbaev.
Redaktory: Evgenıa Golovınskaıa
«SENİM JOLYNDA»
Rejıseri: Ásıa Baıǵojına
Senarı avtorlary: Ásıa Baıǵojına, Mereke Qasen
Operatorlary: Renat Qosaı, Nursat Ákimhan
Dırektory: Nurgúl Nurjigitova
Anyqtama: Sh. Aımanov atyndaǵy «Qazaqfılm» AQ – Kórkem, derekti, anımasıalyq kıno óndirisi men óndiristen keıingi kezeńde turǵan ónimdermen (onyń ishinde montajdaý, dybystaý, t.b.) aınalysatyn Qazaqstandaǵy negizgi kınokompanıa. Sh.Aımanov atyndaǵy «Qazaqfılm» kınostýdıasynyń tarıhy 1934 jyldan bastaý alady, dál osy jyly Almaty kınohronıka stýdıasy quryldy, al 1941 jyly Almaty kórkem fılmder stýdıasy dep ózgertilip, kınostýdıanyń óndiristik negizi barynsha nyǵaıa tústi. 1941 jyly 15 qarashada Almaty kınostýdıasy Qazaqstanǵa evakýasıalanǵan «Mosfılm jáne «Lenfılm» kınostýdıalarymen birlesip, Birlesken Ortalyq kınostýdıa bolyp qaıta qurylyp, Almatyda 1944 jylǵy deıin jumys istedi. Soǵys jyldary kezeńinde otandyq kórkem fılmderdiń 80 paıyzyn atalmysh Ortalyq kınostýdıa shyǵardy. 1960 jyly «Qazaqfılm» ataýyna ıe boldy. 1984 jyly kınostýdıaǵa ulttyq kınematogrfıanyń kórnekti qaıratkeri Sháken Aımanovtyń esimi berildi.
