Búgin Astanadaǵy Hilton Garden Inn Astana» qonaq úıinde EKSPO-2017 kórmesi aıasynda ótetin halyqaralyq marafonǵa arnalǵan baspasóz májilisi ótti dep habarlaıdy Qamshy aqparattyq agenttigi.
Osy jyldyń 4 sáýirinde QR Mádenıet jáne sport mınıstrligi men Shanhaı yntymaqtastyq uıymy (SHYU) jeńil atletıkadan Astanada halyqaralyq marafon ótkizý týraly kelsimge kelgen edi. Bul marafondy qurylǵanyna bıylǵy jyly 25 jyl tolatyn «Azıadaǵy ózara yqpaldastyq jáne senim sharalary jónindegi keńestiń» (AÓSSHK) forýmymen birge ótkizý josparlanǵan.
Astanada ótken baspasóz májilisine QR Mádenıet jáne sport mınıstrliginiń Sport jáne dene shynyqtyrý isteri komıtetiniń tóraǵasy Elsıar Qanaǵatov, QR Jeńil atletıka federasıasynyń birinshi vıse-prezıdenti Eldar Tabanov, «Shanhe» mádenıet jáne sport kompanıasynyń tóraǵasy Chjan Sın qatysty.
– Bıylǵy jyldyń 27 tamyzynda Astanada «Azıadaǵy ózara yqpaldastyq jáne senim sharalary jónindegi keńestiń» forýmymen birge marafon ótkizý týraly sheshim qabyldandy. Ózderińiz bilesizder, EKSPO-2017 kórmesi aıasynda kóptegen halyqaralyq sporttyq jarystar uıymdastyrylady. Sondaı mańyzdy sharalardyń biri Astana halyqaralyq marafony dep otyrmyz. Marafon – Shanhaı yntymaqtastyq uıymynyń qoldaýymen ótkizgeli otyr. Bas hatshysy Rashıd Alımov myrzamen kezdesip, osyndaı kelisimge keldik. Qytaı tarapy beınerolıginen bastap barlyǵyn túsirip, halyqaralyq arenaǵa taratatyn bolady. Ol elde buǵan deıin mundaı iri masshtabtaǵy marafon ótken. Sondyqtan kórshi eldiń marafon uıymdastyrýdaǵy tájirıbesi mol. Endi sol tájirıbesin bizben de bólispekshi, – deıdi E.Qanaǵatov.
Onyń aıtýynsha, marafon úsh qashyqtyq boıynsha ótkiziledi. Qatysýshylar 10, 42 jáne EKSPO-2017 kórmesiniń qurmetine sáıkes 2017 shaqyrymǵa júgiredi. Shetelden 700-1000 myńdaı qatysýshy kelse, ózimizden 4000 marafonshy baq synaıdy dep kútilýde.
– Jeńil atletıka federasıasynyń mańyzdy baǵyttarynyń biri – salaýatty ómir saltyn nasıhattaý. Sondyqtan elimizdiń ár qalalarynda osyndaı marafondar ótkizýdi qolǵa aldyq. Buǵan deıin 6 mamyrda Atyraýda jartylaı marafon ótse, aldaǵy kúnderi Qaraǵandy qalasynda taǵy bir marafon uıymdastyrylady. Sondaı-aq Taraz jáne Óskemen qalasynda ótkizemiz dep josparlap otyrmyz. Al Astanadaǵy halyqaralyq marafon EKSPO-2017 kórmesi aıasynda Shanhaı yntymaqtastyq uıymynyń qoldaýymen qolǵa alynyp otyr. Biz óz tarapymyzdan bul marafnnyń joǵary deńgeıde ótkizilýi úshin aıanyp qalmaımyz. Sondyqtan barlyq qatysýshylarǵa sáttilik tileımin!, – dedi Eldar Tabanov.
Baspasóz májilisiniń sońynda QR Mádenıet jáne sport mınıstrli, QR Jeńil atletıka federasıasy jáne «Shanhe» mádenıet jáne sport kompanıasy arasynda Astana halyqaralyq marafonyn ótkizýge arnalǵan úsh jaqty memorandýmǵa qol qoıyldy.
Ótken jyly Shanhaı yntymaqtastyq uıymy alǵash ret osyndaı halyqaralyq marafon uıymdastyrǵan bolatyn. Oǵan uıymǵa múshe 4 elden 15,6 myń adam qatysqan. Marafon uıymnyń 15 jyldyǵyna baılanysty ótkizilgen edi.
– Shanhaı yntymaqtastyq uıymy aıasyndaǵy bul kelisim bárimiz úshin jemisti boldy. Byltyrǵy jyly osy uıymǵa múshe Qazaqstan, Qytaı, Ózbekstan, Qyrǵyzstan memleketinen 15 myńnan astam marafonshy qatysty. Bıylǵy jyly Astanadaǵy marafonǵa 5 myń adam qatysady dep kútilýde. Bul marafon EKSPO-2017 kórmesi aıasynda ótedi, – deıdi «Shanhe» mádenıet jáne sport kompanıasynyń tóraǵasy Chjan Sın.
