Ulybrıtanıanyń Manchester qalasynda Arıana Grandeniń konserti kezinde jarylys boldy, dep jazady Qamshy aqparattyq agenttigi.

Kýágerler Manchester Arena stadıonynda eki joıqyn jarylysty estigen. Sol kezde Arıana Grande sahnada bolǵan. Qala polısıasy jarylystyń bolǵanyn jáne zardap shegýshilerdiń bar ekendigin rastady.

Daily Mail basylymy habarlasqan konsertke kelýshilerdiń biri oqys oqıǵanyń kýágeri bolǵan. Onyń aıtýynsha, Grande ánin aıaqtaǵan sátte jarylysty estigen. «Barlyǵy shýlap ketti jáne syrtqa umtyldy», - deıdi Evı Brúster.

Ǵımaratqa kóptegen jedel járdem kóligi bet alǵan. Arıana Grandeniń ókili ánshiniń zardap shekpegendigin málim etti. Alaıda ol stadıonda ne bolǵanyn aıta almady.

Aldyn ala aqparat boıynsha, 22 mamyr kúni Ulybrıtanıanyń  Manchester stadıonynda bolǵan jarylystan qaıtys bolǵan jáne zardap shekkender qatarynda Qazaqstan azamattary joq, dep habarlaıdy QR SİM baspasóz qyzmetiniń basshysy Ánýar Jaınaqov.

«Londondaǵy Qazaqstan elshiligi jergilikti quqyq qorǵaý organdarymen tyǵyz  baılanysta. Qazaqstan azamattaryna  saq bolý jóninde eskertýler taratylǵan.

Elshiliktiń konsýldyq bóliminiń jedel jelisi iske qosýly: +44(0)7447470570 (WhatsApp). 

Manchesterdegi jaqyndaryńyz, týystaryńyz nemese dostaryńyzben baılanysyp, olardyń esen-saý ekendigine kóz jetkizýlerińizdi suraımyz», - dep jazdy Jaınaqov óziniń Facebook paraqshasynda.

QR SİM málimdegendeı, jarylys bolǵan alańda qazaqstandyq alty stýdent bolǵan.

«Bizdiń dıplomattarymyz solardyń ekeýimen baılanys jasap, aman-saý ekendigine kóz jetkizdi. Olarǵa eshqandaı medısınalyq kómek qajet emes jáne dostarymen birge turatyn jerlerine aman-esen jetken», - deıdi QR SİM baspasóz qyzmetiniń basshysy. 

Sholýshy: Gúlim Jaqan