2017 jyl mamyrdyń 24 kúni Grekıanyń Aharnon qalasynda Qazaqstan men Grekıa arasyndaǵy dıplomatıalyq qatynastarynyń 25-jyldyǵyna oraı QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ jáne «Novyı mır» JSHS-simen birlese túsirilgen «Anaǵa aparar jol» fılmi kórsetiledi dep habarlaıdy Qamshy aqparattyq agenttigi «Qazaqfılm» Baspasóz qyzmetine silteme jasap. Mádenı is-sharany elimizdiń Grekıa Respýblıkasyndaǵy Elshiligi, QR Mádenıet jáne sport mınıstrligi jáne Sh.Aımanov atyndaǵy «Qazaqfılm» AQ uıymdastyryp otyr.
Rejıser Aqan Sataev túsirgen fılm ómirdiń aýyrtpalyǵyna tótep bergen, qıyn qystaý kúnderi surapyl soǵystyń mehnatyn kórgen basty keıipkerdiń taǵdyryn baıandaıdy. Oqıǵanyń negizgi jelisi qazaq halqynyń basyna túsken aýyr kezeńdi – ujymdastyrý, jut, soǵys jáne soǵystan keıingi jyldardy qamtıdy.
Esterińizge sala ketsek, atalǵan tarıhı týyndy 38-shi Halyqaralyq Máskeý kınofestıvalinde jáne «Eýrazıalyq kópir» atty festıválge qatysyp, Bas júldeni, sonymen qatar aktrısa Altynaı Nógerbek «Úzdik áıel adam róli» nomınasıasynda jeńiske jetti. Odan bólek, bul týyndy bıyl Qazaqstan kınosynshylar asosıasıasy uıymdastyrǵan «Synshylar tańdaýy» júldesinde úsh birdeı júldeni ıemdendi. Atap aıtsaq, «Eń úzdik aktrısa» - Altynaı Nógerbek; «Ekinshi plandaǵy úzdik aktrısa» Arýjan Jazylbekova; «Fılmge jazylǵan úzdik mýzyka» nomınasıasyn atalmysh fılmniń kompozıtorlary Álim Zaırov pen Roman Vıshnevskıı ıemdendi. Odan bólek, kınotýyndy jaqynda ǵana Bishkekte ótken «Aq ilbiris» atty VI ulttyq kınojúldesinde Ortalyq Azıanyń úzdik fılmi atandy.
«Anaǵa aparar jol» fılmi 24 mamyrda saǵat 19:00-de Aharnon ákimdigi zalynda kórsetiledi. Kirý tegin.
«Anaǵa aparar jol»
Fılm týraly: Fılmniń jelisi qazaq halqynyń HH ǵasyrda bastan keshken kúrdeli tarıhı kezeńderden qurylǵan, atap aıtsaq, kúshtep júrgizilgen ujymdastyrý naýqany, ulttyń basyna túsken uly tragedıa – jut (asharshylyq), Uly Otan soǵysy jáne soǵystan keıingi beınetti jyldar. Fılm ómirdiń aýrtpashylyǵyna tótep bergen, qıyn qystaý kúnderi surapyl soǵystyń mehnatyn kórgen, jat elde tutqynda bolǵan İlıas esimdi jigittiń taǵdyryn baıandaıdy. Bóten jerde aıdaýda júrse de, jat eldiń zorlyq-zombylyǵyn kórip, qıanatyn keshse de, jalǵyzdyqtyń taýqimetin tartsa da, bas Qaharman atajurtyn ańsap, anasyn saǵynyp, týǵan jerine oralatynyna eshqashan kúmandanbaıdy.
