Taldyqorǵanda janry men jazylý ereksheligi árqıly 39 kitaptyń tusaýkeser rásimi bir mezgilde ótti,dep habarlaıdy Qamshy aqparattyq agenttigi.

Jetisýlyq aqyn-jazýshylardyń 2017 jyldyń I toqsanynda Almaty oblysy ákiminiń qoldaýymen shyqqan kitaptarynyń tusaýkeseri Taldyqorǵan qalasyndaǵy Til saraıynda ótti. Oqyrmandarǵa túrli mazmundaǵy 39 kitap tanystyryldy. Olardyń arasynda pozıalyq, prozalyq, ǵylymı jáne pýblısısıkalyq kitaptar bar.

«Jyrǵa tunǵan mekenim - Jetisýym» atty tusaýkeser sharasyn oblys ákiminiń orynbasary Jaqsylyq Omar júrgizdi.

- Mádenıet pen ádebıetke qamqorlyq jasaý maqsatynda Memleket basshysy osydan 14 jyl buryn «Mádenı mura» memlekettik baǵdarlamasyn júzege asyrýdy tapsyrǵan bolatyn. Osy baǵdarlama aıasynda 2006 jyldan beri  Jetisý qalamgerleriniń kitaptaryn shyǵarý dástúrge aınalyp keledi.  Jyl saıyn oqyrmanǵa jol tartqan jańa jınaqtar óńirdiń rýhanıatyna úlken úles bolyp qosylyp, jas urpaqtyń tanymyn keńeıtýge yqpal etip keledi, - dedi Jaqsylyq Omar.

Sonymen qatar obly ákiminiń orynbasary oblys kitaphanalaryna engizilip jatqan «Elektrondy memlekettik kitaphana qory» jobasy sheńberinde shyǵarylǵan kitaptardyń sandyq taspaǵa engizý júrip jatqanyn jáne basqa da atqarylǵan jumystarǵa toqtalyp ótti.

Munan soń «Sezim syry» kitabynyń avtory Hasen Kóptileýov aq batasyn berip, Qazaqstannyń halyq ártisi, akter Nurjuman Yqtymbaevpen birge kitaptardyń lentasyn qıdy.

Tusaýy kesilgen kitap avtorlary ózara pikir almasyp, oılaryn ortaǵa saldy. Olardyń qatarynda Qazaqstan Sýret akademıasynyń prezıdenti Amanqos Aqanaev, «Kartınalar toptamasy» fotoalbomynyń avtory Marat Núsipov, «Jeńis - Pobeda» kitabynyń avtory Vıktor Nıkıtın, «Aıqabaq» kitabynyń avtory Ámire Árin, sol sıaqty «Taý men ózen baıany», «Jetisýǵa quıylǵan jylǵalar» atty jınaq kitaptarynyń qurastyrýshylary Erlan Júnis, Esbolat Aıdabosyn jáne basqalary bar. Sóz sóılegender Almaty oblysynda ádebıettiń damýyna erekshe kóńil bólinetinin atap ótip, kitap shyǵarýǵa kórsetilgen qoldaýlar úshin rızashylyqtaryn bildirdi.

Sholýshy: Aıgerim TAÝBAI