Memleket basshysy BAÁ syrtqy ister mınıstrine sáttilik tilep, elderimiz arasyndaǵy baılanystardyń qarqyndy damyp kele jatqanyn atap ótti, dep habarlaıdy Qamshy aqparattyq agenttigi Aqordaǵa silteme jasap.

– Siz bizdiń elge resmı saparmen Qazaqstan men Birikken Arab Ámirlikteri arasyndaǵy dıplomatıalyq qarym-qatynastyń ornaǵanyna 25 jyl tolýyna oraı kelip otyrsyz. Búgin Astanada birlesken bıznes-forým ótip jatyr. Bıyl men Arab Ámirlikterinde eki ret boldym. Sheıh Muhammed ben Zaıd Ál Nahaıanmen sońǵy kezdesýimizde kóptegen máseleler boıynsha ýaǵdalastyqqa qol jetkizdik, – dedi Qazaqstan Prezıdenti.

Nursultan Nazarbaev ekijaqty baılanystardy nyǵaıtýdyń mańyzdylyǵyna toqtalyp, bıylǵy jyl eki el arasyndaǵy yntymaqtastyqtyń jańa kezeńiniń bastaýy bolatynyna senim bildirdi.

– Ózara senim men  baýyrlastyqqa negizdelgen bizdiń qarym-qatynasymyz – basqalarǵa úlgi. Muny odan ary damytýǵa bar kúsh-jigerimizdi salýǵa tıispiz, – dedi Memleket basshysy.

Abdalla ben Zaıd Ál Nahaıan ekijaqty ózara is-qımyl barysyna kóńili tolatynyn, ony jańa deńgeıde nyǵaıta túsý qajettigin atap ótti.

Sondaı-aq, BAÁ syrtqy ister mınıstri Saýd Arabıasy Koróldiginde ótken samıttiń tabysty bolǵanyn aıtyp, sonyń aıasynda Qazaqstan Prezıdentiniń Abý-Dabıdiń taq murageri, sheıh Muhammed ben Zaıd Ál Nahaıanmen áńgimeleskenin eske saldy.