QR Qylmystyq kodeksiniń 21 babyna azamattyqtan aıyrý túrindegi qosymsha qylmystyq jaza engiziledi. Bul jaıynda búgin QR Parlamenti Májilisiniń jalpy otyrysynda belgili boldy, dep habarlaıdy Qamshy aqparattyq agenttigi QazAqparat-qa silteme jasap.

Otyrysta «Qazaqstan Respýblıkasynyń keıbir zańnamalyq aktilerine olardy Qazaqstan Respýblıkasy Konstıtýsıasynyń normalaryna sáıkes keltirý máseleleri boıynsha ózgerister men tolyqtyrýlar engizý týraly» QR zańynyń jobasy jóninde Ádilet mınıstri Marat Beketaev baıandama jasady.

Onyń aıtýynsha, usynylyp otyrǵan zań jobasynyń maqsaty  zańnamalyq aktilerdi Konstıtýsıaǵa engizilgen túzetýlerge sáıkes keltirý. Joba Prezıdenttiń Jarlyǵyn iske asyrý maqsatynda ázirlendi. Konstıtýsıaǵa sáıkes keltirý úshin 7 kodeks pen 46 zańǵa ózgerister engizý qajet. «Qylmystyq kodekstiń 21 babyna azamattyqtan aıyrý túrindegi qosymsha qylmystyq jaza engizý kózdeledi. Osylaısha, Qylmystyq kodekstiń 10 babynda kózdelgen 14 asa aýyr terorıstik qylmystar quramy boıynsha qosymsha jaza retinde azamattyqtan aıyrý usynylyp otyr. Mysaly, terorızm aktisi úshin, terrorıstik top qurý, oǵan basshylyq etý jáne onyń áreketine qatysqany úshin jáne taǵy basqalary», - dedi mınıstr.

Beketaev «Ulttyq qaýipsizdik týraly» Zańǵa sáıkes negizgi ulttyq múddelerge konstıtýsıalyq qurylystyń tutastyǵy jatatyndyǵyn atap ótti. Bul uǵymǵa eldiń táýelsizdigi, birtutastyǵy jáne prezıdenttik basqarý nysany kiredi.  «Qazaqstan Respýblıkasynyń negizgi ulttyq jáne ómirlik mańyzy bar múddelerine aýyr zıan tıgizetin qylmystarǵa 11 bapta kózdelgen 16 túrli  qylmys quramdary kirdi. Mysaly, genosıd, separatıstik áreket, ekstremıstik top qurý, oǵan basshylyq etý nemese onyń áreketine qatysý jáne taǵy basqalary.

Bul jazany sot erekshe jaǵdaılarda jasalǵan is-áreketterdiń jáne ákep soqqan zardaptyń aýyrlyǵyn, istiń naqty mán-jaıyn negizge ala otyryp taǵaıyndaıdy. Azamattyqtan aıyrý sottyń zańdy kúshine engen aıyptaý úkimi negizinde ýákiletti organda tirkeýge jatady», - dedi ol.