Keshen, 23 mamyrda  kóship kele jatyp, shekara qyzmetkerleri aqshasyn alyp qoıǵan Gúljan Máýithanqyzynyń máselesine baılanysty  Astanada kezekti márte  baspasóz máslıhaty ótti. Jıynǵa qoǵam belsendileri, zańgerler jáne jýrnalıser qatysty.

«Jurt degende jumylyp, el degende egiletin» qandastardyń qoǵamdyq rezonans týdyrǵan máselesi 3 aı ótse de óz sheshimin tapqan joq. «Maıqapshaǵaı» kedendik baqylaý beketinde 59900 AQSH dollarynan aıyrylǵan jesir anaǵa baılanysty birinshi sot otyrysy 17 naýryzda Zaısan qalasynda ótken bolatyn. Sot úkimi 234-bap boıynsha Gúljan Máýithanqyzyn aıypty dep tanyǵan. Sonymen qatar, 68 myń teńge aıyppul salyp, qalǵan 40 myń dollardy memleketke kiris retinde aýdarǵan edi. Alaıda, birinshi sot sheshimin ádiletsiz dep narazy  bolǵan jurttyń qarasy kóp. Endi apelásıalyq sot otyrysy 1 maýsymda Óskemen qalasynda ótedi.

 «Kózimniń tirisinde urpaqtarymyzdyń  óz elinde ósip-óngenin kóreıin, «elim, jurtym»  dep kelgenbiz. Qazir óz aqshamyzdan ózimiz aıyrylyp dalada júrmiz. Ekinshi sot otyrysynan úmitim kóp»,- deıdi Gúljan Máýithanqyzy.

Bul másele ulttyq ımıjimizge kereǵar ekenin alǵa tartqan qoǵam belsendileri óz kezeginde aldaǵy apelásıalyq sot otyrysyn jiti nazarda ustaıtynyn jetkizdi.

 Abzal Quspanov, zańger:  «Qylmystyq jaýapqa tartylý úshin, qoldanystaǵy zańnamaǵa sáıkes bul kisilerdiń tarapynan sýbektıvti áreket dáleldený kerek. Ondaı áreket dáleldengen joq. Sonymen qatar memleketke, QR-nyń búdjetine eshqandaı zalal kelip otyrǵan joq. Demek, bul jerde qylmystyq quram joq.  Bar bolǵany bir japyraq qaǵazdy toltyrýdy bilmegen»

Muhtar Taıjan, qoǵam qaıratkeri:  «Osy memlekettiń azamaty retinde, qazaq retinde osyndaı jaǵdaı úshin sizden keshirim suraımyn. Memleketimizdiń sot júıesinde túsiniksiz jaǵdaılar bar. Qansha qarjyny jymqyrǵan qylmyskerler bostandyqta júr. Al, qarakóz qandastarymyz bilmestik úshin jaýapkershilikke tartylyp, 6 aıdan beri áýre-sarsańǵa túsip júr. Múlde túsiniksiz»

Ǵalym Baıtýk, qoǵam qaıratkeri: «Osy kezde Abaı tiri bolsa: «Qaıran, qazaǵym-aı» dep kúrsiner edi... Kırıllısa qaripin tanymaıtyndyǵyn paıdalanyp, bulaı aldaý uıat nárse»

Jaýdy da jat kórmegen qazaqpyz.  Ata-jurtyn izdep kelgen qandastarǵa dál bulaı opasyzdyq jasaý eshqandaı moraldyq-etıkaǵa da, rýhanı-adamgershilikke de jatpaıdy.  Jesir ananyń kóz jasyn kórer kóz, estir qulaq bolaryna biz senemiz...

Osy is boıynsha QR-nyń Bas prokýratýrasyna búgin shaǵym túsiriledi jáne istiń nátıjesi  bizdiń nazarda  bolady. 

Nazerke Órqara