Almaty ákimdiginiń ókilderi burynǵy tramvaı deposynyń ornynda qandaı nysandar salynatynyn aıtyp berdi, - der habarlaıdy Qamshy aqparattyq agenttigi patrul.kz –ke silteme jasap.
"Burynǵy tramvaı parkiniń aýlasynda Loft-ortalyq ashylyp, munda jastarǵa qyzmet kórsetý aımaǵy, kovorkıng ortalyq, 5 sheberhana, oqý jáne konferens zaldary, English club, memlekettik tildi oqytý ortalyǵy, 10 bilim seksıasy jumys isteıdi", - dep habarlady baspasóz qyzmetindegiler.
Loft-ortalyqta, aıtýlarynsha, 25 ÚEU 3 myńnan asa jaspen qoıan-qoltyq jumys atqarady. Budan ózge, Loft-ortalyq bazasy negizinde Syrttan kelgen jastarmen jumys isteý ortalyǵy, Karera ortalyǵy, Jataqhanaǵa jetekshilik ortalyqtary da bolady eken. Iaǵnı, jastar bir mekenjaıdan ózine kerek aqparatty, qoldaý alyp, problemalaryn sheship, alǵa qoıǵan isin damytady.
Atalǵan joba abaqtydan bosap shyqqan jastardyń aldaǵy ýaqyttaǵy kún kórisine de óz septigin tıgizetini habarlandy.
Mundaı sheshim Jastardy 2020 jylǵa deıin qoldaýdyń Jol kartasynyń aıasynda qabyldanǵany belgili boldy. Ol negizgi bes baǵyttan turady, olar-sapaly bilim, jumyspen qamtý, mádenı demalys jáne salaýatty ómir salty, turǵyn úı jáne jas otbasylardy qoldaý, belsendi jastar qalasy.
Jol kartasyn júzege asyrý úshin 7,2 mıllıard teńge bólinip otyr eken. Aıta keteıik, Almatyda búginde 14-ten 35 jasqa deıingi aralyqta 700 myńnan astam jas bar, olardyń 435 myńy - ekonomıkalyq belsendi jastar. Tek sońǵy 5 jyl ishinde jastardyń úlesi 10 paıyzǵa artty. Jasalǵan boljam boıynsha, Almatyda 2020 jyly ekonomıkalyq belsendi jastar qatary 500 myńnan astam adamǵa artady dep kútiledi.
Sholýshy: Aıgerim Taýbaı
