Ol 30 jastaǵy dene shynyqtyrý páni ustazynyń soqqysynan bas-mı jaraqatyn aldym dep otyr. Aqsaqal nusqaǵan, Mártók aýdanyna qarasty Hlebodar orta mektebiniń keıbir muǵalimderi de dene tárbıesi páninen sabaq beretin ustazdyń buǵan deıin de buzaqylyq áreketterge barǵanyn aıtady, dep habarlaıdy Qamshy aqparattyq agenttigi 31 arnaǵa silteme jasap.
Aıdyń - kúnniń amanynda balamdaı adamnan taıaq jedim degen Júsip Bıgelov qazir oblystyq jedel járdem aýrýhanasynda jatyr. Zeınetkerlik demalysqa shyqqannan keıin shaǵyn avtobýs alyp, aýyl arasyna jolaýshylardy tasyp qatynaıtynym bar edi deıdi. Osydan on eki jyl buryn Ózbekstannan qonys aýdarǵan qart jas muǵalimniń saqalymdy sılamaǵany ókintedi dep otyr. Aıtýynsha, kórshi aýylǵa fýtboldan jarysqa aparyp kelýdi ótingen azamat sońynda ózin soqqyǵa jyqqan.
Júsip Bıgelov, turǵyn:
- Aparasyń Hlebodarǵa dedi. "Aý, janym meniń qazir benzınim jetpeıdi, erteń men Mártókke baratyn edim",- dedim. Sonyń arasynda kakoı - to sekýndtiń arasynda meni urdy. Urǵan kezde men bez soznanıa qalǵanmyn ǵoı. Kózimdi ashsam taǵy uraıyn dep tur eken. "Áı, saǵan ne qyldym, aınalaıyn?",- dep edim, myna jaqtan júgirip keldi. Eger súırep alyp ursa ólip qalatyn edim.
Soqqyǵa jyǵylǵan aqsaqal qazir neırohırýrgıa bóliminde em alyp jatyr. Dárigerlerdiń aıtýynsha, óz-ózine kelip qalǵan.
Serjan Janahmetov, Aqtóbe oblystyq jedel járdem aýrýhanasy neırohırýrgıa bóliminiń emdeýshi dárigeri:
- Bizdiń osy BSMP neırohırýrgıa bólimshesine bas mı jaraqaty, bas mıynyń shaıqalýy jáne de murynnyń jumsaq tilimderiniń soǵylý dıagnozymen tústi. Jaǵdaıy qazir bir qalypty.
Aqsaqaldy urdy degen jigit mine, myna mekteptiń muǵalimi. Al mekteptiń keıbir ustazdary 2008 jyly "Dıplommen aýylǵa" baǵdarlamasymen kelgen azamattyń buǵan deıin de ersi qylyqtarymen kórinip qalǵanyn aıtady. Naqtysy, mektep dırektorynyń sózinshe, ol buǵan deıin mektepke ish kıimmen kelipti. Alaıda sodan keıin jumystan qýylǵan muǵalim sotqa shaǵymdanyp, sot arqyly qyzmetke qaıta kelipti.
Ádilbek Tájibaı, Hlebodar orta mektebiniń dırektory:
- Bul jigitti 2015 jyldyń qarasha aıynda jumystan shyǵardym. Eńbek kodeksiniń 54 baby 1 tarmaǵy boıynsha. Biraq sol árekettermen sotqa shaǵymdandy. Sottyń sheshimimen jumysqa qaıta qosyldy.
Dırektor qol astyndaǵy muǵalimniń bul shýy mektepten tys ýaqytta bolǵan degendi aıtady. Eger quqyq qorǵaý organdary isti tergep, muǵalimdi kináli dep tanysa ǵana jumystan shyǵaramyn dep otyr. Al oblystyq ishki ister departamenti muǵalimniń ústinen aryzdyń túskenin, jáne qazir buzaqylyq baby boıynsha is qozǵalǵanyn aıtady.
