Astanalyq qańǵybastar jappaı Kókshetaýǵa kóship ketti, dep jazady Qamshy aqparattyq agenttigi.
KTK arnasynyń habarlaýynsha, olardy arnaıy avtobýsqa tıep, osynda alyp kelgen. «Elordalyq» degen attan aırylǵan úı-kúısizderdi endi turǵyndar turmaq, jergilikti qańǵybastar da jaqtyryp jatqan joq. Óıtkeni, nanǵa naǵyz talas bastalǵan. Al bas qaladan jer aýyp ketkender ózderin EKSPO qarsańynda qýyp jiberdi dep ókpelep otyr.
Al Kókshetaý kóshelerinde óz qańǵybastary jetpegendeı endigi astanalyq qańǵybastar qosylyp, kósheniń ár buryshyn jaýlap alǵan. Qaladaǵy kez-kelgen qoqys jáshiginiń mańynan taǵam tergen elordalyq turaǵy joq adamdy kezdestirýge bolady. Kóbi úılerdiń mańyndaǵy jasyl jelek, aǵashtyń túbin demalatyn orynǵa aınaldyryp alǵan. Mine, árqaısysy ár jerde domalap uıyqtap jatyr. Kez-kelgenin oıatyp surasańyz, «Esildiń sol jaǵalaýynan kóship keldim» deıdi.
Árıne, qańǵybastardyń 300 shaqyrymdy artqa tastap, Astanadan Kókshetaýǵa qonys aýdarý oılarynda da bolmapty. Aıtýlarynsha, olardy arnaıy avtobýspen Kókshetaýǵa jetkizgen de, kóshelerge qoıa bergen.
Kókshetaýǵa qonys aýdarǵan elordalyq turaqty meken-jaıy joq adamdardyń kóńil-kúıleri joq. Astanadaǵy «jilikti oryndarynan» aırylǵanyna ashýly. Onyń ústine shaqyrylmaǵan qonaqtarǵa jergilikti qańǵybastar qyr kórsete bastaǵan. Turǵyndarda olardy músirkep otyrǵan joq.
Meken-jaıy ózgergen astanalyq qańǵybastar EKSPO ótetin jerge barmas edik dep renjýli. Al polıseıler úı-kúısizderdi bas qaladan qýyp jatqan joqpyz deıdi. Kerisinshe, arnaıy ortalyqqa jetkizip, bas saýǵalaıtyn jer taýyp bergen.
Osyǵan qatysty Astana qalalyq İİD baspasóz hatshysy Sofıa Qylyshbekova búı dedi: «Ortalyqqa 300 astam turaqty meken jaıy joq azamat jetkizildi. Olardyń kim ekeni anyqtalǵannan keıin týystaryn izdeımiz».
Sondaı-aq, polıseıler úı kúısizderdiń aýrýyn anyqtap, emdelýine, qujattaryn qaıta qalpyna keltirýge de kómektesip jatyr eken. Al kútpegen jerden jer aýyp ketken qańǵybastar Astanany saǵynyp júrgenderin aıtady. Biraq qaıtarǵa soqyr tıyndary da joq. Endi olarǵa EKSPO bitpeıinshe, ıaǵnı kúzge deıin azyǵyn Kókshetaýdan tabýǵa týra keledi.
