Ol jýsannyń inisi,

Sheńgel bolyp kektegen,

Maǵan erek jupary

Jýsandardan kóptegen.

Bir aqyndy izdeımin

Kókpek jaqqan kóne úıdiń

Kójesimen kóktegen.

Men Jaıyqtyń qyzymyn,

Ol Yrǵyzdyń balasy,

Dosy da joq, jaýy joq,

Joq eshkimmen talasy.

Bir aqyndy izdeımin

Bárin únsiz keshirip,

Bıikteý turǵan baǵasy.

Sábı kóńil senimi men dámesi

Ózinen zor ólermen,

Tiregi joq,

Jalǵyz dosy –júregi

Bir aqyndy izdep kelem áli men.

Dárýish oı, dármenim joq qashýǵa

Qutylarmyn degen eń,

Nege ekenin bilmesem de búginde

İziń qýyp kelem men.

Bir bilerim –bul álemge kerekpiz

Shydatpaıdy  shól deıtin.

Sol úshin de óleń bolyp qalamyz

Máńgilikke ólmeıtin.

Óleń jazý –óle almaýdyń ermegi?!.

Má endeshe ne qaldy?..

Shyndyq qansha ashshy bolsyn kermegi

Shóldegenge obaldy.

Sonda qalaı...

Men tonaldym, tonaldym...

Jo-joq, mine

Nur taýyp ap muńnan da

Meıirimdi bop aldym... 

Avtory: Gúlmıra Súıekenova