«Qazaqstannyń turǵyn úı qurylys jınaq banki» degen bar. Aty jaqsy, nasıhaty da jaqsy. Biraq  zańdy belshesinen basyp, memlekettik tildi mensinbeı otyr.

Qazaqstannyń eń ózekti máselesi baspana máselesi ekeni jasyryn emes. Aýdan, qalalarda turǵyn úı kezegine myńdaǵan adamdar turǵan. Jaqynda ǵana áleýmettik jelide #ulydalakvartıranty atty heshteg tanymal bolyp ketip, úı jaldap turatyn jurttyń qarasy kóptigi bilinip edi. Aqshasy kóptiginen jaldamaıdy ǵoı. Baspanasy joqtyǵynan.

Sondaı tólem qabileti bar baspanasy joq jandarǵa, jastarǵa arnalyp osy taqyryptaǵy bank memleket tarapynan qurylǵan. Iaǵnı,qurylǵanyna 14 jyl bolǵan bank shetelden dendep kirgen bank emes kapıtaly 100 paıyz memleketke tıesili qazaqtyń banki.

Banktiń jarnamasyn nege «jasap» otyrmyn. Qarańyz, mynaý bank saıtynyń bas beti. Onda aqparattar ornalasady. Úsh til de ornalasqan(qyzylmen syzylyp tur). Túsinikti. Osynda ınternet-bankıng degen bar. Ol banktiń árbir tutynýshysyna eń qajettisi. Banktiń kez-kelgen salymshysy, zaem alýshysy osy jeke kabınetten jınaqtaǵy aktıvterin baqylaıdy. Tolyqtyrady. Tutynýshylar saıttyń bas betin aqtaryp otyrmaýy múmkin, biraq jeke kabınette tapsyrysty da beresiz, úı alýdyń múmkindigin de esepteısiz. Iaǵnı aqparattyń kerektisi sonda. Biraq onda bank nege ekenin qazaq tilin qospaǵan... tek jalǵyz til – orys tili. Qalasań da sol tildi qoldanasyń. Qalamasań da.

Banktiń saıty jańa ashylǵan saıt emes. Áli tolyqtyrylmady dep qutylatyndaı. Bul neni túsindiredi? Banktiń basshylary túrli turǵyn úı baǵdarlamalarynan qazaqtardyń, qazaq tildilerdiń maqrum qalǵanyn qalaı ma álde? Suraqtyń jaýabyn bank bere jatar. Biraq bizge keregi aqtalǵan «sandalbaı» jaýap emes. Naqty nátıje!

Aqan Bektas