Qanat Islam men Norberto Gonsales kezdesýi AQSH-tyń Florıda shtatyndaǵy Boka Raton qalasynda ornalasqan «Boca raton resort & club»-ta ótti. Maıtalmandar WBO NABO jáne WBA Inter-Continental vakantty tıtýly úshin talasty. Osy keshte Janqosh Turarov 21-inshi jeńisine jetti.
Bul Qanat Islamnyń AQSH-taǵy tórtinshi kezdesýi. Sharshy alańǵa «Dúr Qamshy» ánimen kóterilgen Qanat Islamnyń kıimi de erekshe bezendirilgen.
32 jastaǵy otandasymyz Qanat Islam kásipqoı boksqa 2012 jyly aýysyp, sol ýaqyttan beri eshkimge des bergen joq. Ol ózi ótkizgen 22 kezdesýdiń barlyǵynda jeńiske jetti. 20 ret qarsylasyn nokaýtqa túsirdi. Qanat Islam WBO Intercontinental jáne WBA Fedelatin chempıondyq ataqtaryna ıe.
Norberto Gonsales búginge deıin 31 kezdesý ótkizip, 23-inde jeńiske jetken: 13 jekpe-jegin nokaýtpen jeńip, 8 kezdesýinde jeńilis tapqan. Norberto Gonsalestiń laqap aty – Ázázil! Ol óz salmaǵy boıynsha meksıkalyq boksshylardyń úzdik tórttiginde.
12 raýndqa sozylǵan kezdesýdiń alǵashqy raýndynan-aq Qanat basym qozǵalysta boldy. Kóp soqqy jiberse de qarsylasy da osal emes ekenin kórsetti. Besinshi raýndta Qanattyń buryshqa qamaǵan soqqylarynan Gonsalestiń qabaǵy jarylyp, betin qan jýyp ketti. 9-ynshy raýndta Gonsales óziniń sharshaǵanyn anyq kórsetti. Tek qorǵanysqa kóshken ol Qanatqa qaıta-qaıta jabysyp alyp jatty. Jaraqat alsa da jekpe-jekten bas tartqan joq. Jekpe-jek basynan bastap Qanattyń basymdyǵynda boldy deýge bolady. 24-inshi kezdesýinde Qanat upaı sanymen jeńiske jetti. Jeńis sózinde jerlesimiz bokssúıer qaýymdy EXPO kórmesine shaqyrdy.
Árbir jekpe-jegin jastar asyǵa kútetin Qanat Islam sońǵy ret aqpan aıynda Amerıkanyń Delaver shtaty Ýılmıngton qalasynda brazılıalyq boksshy Robson Assıspen jekpe-jek jasaǵan bolatyn. Oıyn bastala sala jerlesimiz qarsylasyn bir mınýtqa jetpes ýaqytta-aq nokaýtqa jibergen edi. Jerlesimiz 22-inshi kezdesýin Almatyda ótkizgen bolatyn. 2016 jyldyń aıtýly oqıǵalarynyń biri retinde este qalǵan, 29 qazan «Almaty arenada» ótken básekede Qanat Islam qarsylasy Patrık Aloteıdi upaı sanymen jeńdi. Ótken jyldyń eń mańyzdy sporttyq oqıǵasynda Qanattan bólek, Janqosh Turarov ta básekelesi Aısak Arıeni (Gana) 4 raýndta jaıratyp salǵan edi.
Aıta ketsek, birneshe kún buryn ǵana Halyqaralyq boks qaýymdastyǵynyń (IBF) jańarǵan qurlyqtyq reıtıńisinde otandasymyz kósh basyna shyqty.
Qazaq bıyl 9 qyrkúıekte Astanada jekpe-jek ótkizedi dep josparlanǵan. Belgili bolǵandaı oǵan qyzyǵýshylyq tanytyp, «quda» túsip jatqan promoýterler kóp. Maık Taısonnyń jattyqtyrýshysy bolǵan Steısı Makkınlı de onyń jattyǵýyn baqylyp júrgen kórinedi. Osy jekpe-jek barysynda Qanat Islammen túrli kelisim sharttar jasalǵany da habarlady.
Atalǵan kezdesýge mesenat Baýyrjan Ospanov pen Almaty ákimi Baýyrjan Baıbek qoldaý jasasa, «Qazaqstan» men «Kazsport» telearnalary Qanat Islam (23-0, 19KO) men Norberto Gonsalestiń (23-8, 13KO) jekpe-jegin tikeleı efırde kórsetti.
