Robototehnıka – Qazaqstannyń bilim berý mekemelerinde engizilip jatqan jańa baǵyttardyń qatarynda dep jazady Qamshy aqparattyq agenttigi QR Bilim jáne ǵylym mınıstrliginiń Baspasóz qyzmetine silteme jasap. Búginde respýblıkamyzdaǵy júzdegen mektep pen joǵary oqý ornynda óte bastaǵan bul aralas pánniń quramynda birqatar qoldanbaly pánder bar. Bolashaq robot qurastyrýshy matematıka men fızıkany, ınformatıka men syzýdy, basqa da birqatar ǵylym salasyn mindetti túrde meńgerýi tıis. Al ótken jyldan bastap oqyǵandary men úırengenin tájirıbe júzinde qoldanýǵa múmkindik berilýi osy bir erekshe mamandyqtyń qyzyǵyna boılaǵan qazaqstandyq balalar úshin asa mańyzdy qadam boldy.
Bilim jáne ǵylym mınıstrliginiń bastamasymen elimizdegi birqatar bilim berý mekemeleri jańa LEGO Education jıyntyqtarymen jabdyqtaldy, onyń kómegimen oıǵa alǵan eń batyl jobalardy da júzege asyrýǵa bolady, atap aıtqanda, kóptegen múmkindigi bar jáne birqatar qyzmetti atqaratyn naǵyz robottardyń úlgisin jáne baǵdarlamasyn jasaýǵa bolady. Demeýshilerdiń qarjysyna alynǵan 400 synyp-komplekt arqasyna shamamen 20 myń mektep oqýshysy tájirıbe júzinde robot qurastyra alady. Bul qyzyqty ári bolashaǵy zor baǵytty damytý boıynsha alǵashqy qadam ǵana.
Bıylǵy sáýir aıynyń sońynda Qaraǵandy qalasynda ótken «RoboLand-2017» festıvali joǵary tehnologıaly qural-jabdyqtarǵa jumsalǵan aqshanyń tekke ketpegenin kórsetti. Muny QR Bilim jáne ǵylym mınıstri Erlan Saǵadıev te atap aıtty, mınıstr óz sózinde robototehnıkanyń búgingi kúni el damýynyń basym baǵyttarynyń biri ekenine toqtaldy. Bilim mınıstri bıylǵy oqý jylynda bolashaǵy zor osy pándi oqıtyn oqýshylardyń sany eki esege artatynyna ýáde berdi.
Robototehnıka kýrstarynyń baǵdarlamasymen áriptestik ornatqan qazaqstandyq mektepterdiń dırektorlary bul oqýshylardyń logıkasyn damytyp, motorıkasyn jetildirip, basqa da qabiletterin ashady dep esepteıdi. Ári proses qyzyqty bolǵandyqtan, balalar jalyqpaıdy. Mektep basshylyǵy ókilderiniń bul pikirimen kelispeske amal joq, kórneki qural retinde bala kúnnen jaqsy tanys qurastyrǵysh kýbıkter paıdalanylatyn sabaqty jaqsy kórmeý múmkin emes. Oqýdyń qyzyqty bola túsýiniń taǵy bir sebebi, mindetterdi sheshý tek tájirıbeni ǵana emes, sonymen birge shyǵarmashylyq kózqarasty qajet etedi. Sondaı-aq, robototehnıka kýrsynyń baǵdarlamalary ártúrli topqa arnalǵanyn da atap aıtqan jón: mektepke deıingi balalarǵa, bastaýysh synyp oqýshylaryna jáne orta synyp oqýshylaryna.
Balalar mekteptegi qandaı da bir pánderdi unatpaýy múmkin, biraq robototehnıka elementterimen birikken ýaqytta olar oıyn formasynda ótedi. Mektep basshylarynyń baqylaýynsha, balalar Bilim jáne ǵylym mınıstrliginiń jańa bastamasyn qýana qabyldaǵan: óıtkeni konstrýktorlar bala kezden-aq ýaqytty qyzyqty ótkizýmen este qalady. Oqýshylar burynǵydan góri yntaly bola túsken, óıtkeni robototehnıka kýrsy tek oqý ǵana emes, oıyn da.
Álbette, mektep basshylary úshin óz mektepteriniń bedeli de aldyńǵy qatarda. Dırektorlar robototehnıka kýrstarymen áriptestik baılanys ornatqan mekteptiń aldyńǵy qatarly oqý ordasy bolatynyn, básekelesteriniń arasynda qurmetke ıe bolatynyn da jaqsy túsinedi. Ata-analar da bul jańalyqty qýana qabyldap otyr: keıbir ata-analar mektep tańdaǵan ýaqytta da robototehnıka kýrsynyń bolýyna nazar aýdaratyn bolady. Óıtkeni, ata-analar robot tehnıkasyn meńgerý balanyń bolashaǵy úshin úlken múmkindik ekenin jaqsy túsinedi.
Mektep dırektorlary robototehnıka baǵdarlamasy oqýshylardyń múmkindigin asha túsedi dep esepteıdi. Bul mektep basshylary men pedagogtarǵa joǵary synypqa kóshken balalardy beıindik baǵytqa bólgen ýaqytta da kásibı turǵyda qaraýǵa kómektesedi dep biledi. Baǵdarlamaǵa qatysý arqyly mektepten tys jerde de bala ózin kórsete alady: balalardyń robototehnıka boıynsha halyqaralyq olımpıadaǵa qatysýǵa, mektebiniń ǵana emes, eldiń de namysyn qorǵaýǵa múmkindigi bar. Al jalpy alǵanda, mektep dırektorlary men dırektordyń orynbasarlary robototehnıka kýrstaryn bilim berýdiń ınovasıalyq tásilge kóshýiniń úlgisi dep biledi. Bul kýrstar oqý oryndarynyń «Qazaqstan-2050» memlekettik baǵdarlamasyna ilesýine de járdemdesedi.
