26 mamyr kúni qazaq elinde, qazaq jerinde qazaqtyń naǵyz azamattary qoıǵan uly kesh ótti. «Bizben birge» dep atalatyn qaıyrymdylyq shoý konserti zalǵa jınalǵan dúıim jurttyń júregin bastalmaı jatyp jaýlady.

Alashuly toby – 2009 jyly T. Júrgenov atyndaǵy Óner akademıasynyń qabyrǵasynda qurylǵan ulttyq dástúrdi ulyqtaǵan mýzykalyq top. Búginde bar qazaqqa tanylyp úlgergen. «Bir atanyń emes, barsha Alashtyń uly bolaıyq» degen nıettegi azamattardyń basty maqsaty – jastardyń rýhyn kóterip, qazaqtyń ulttyq ónerin keńinen nasıhattaý, qazaq elin jahanǵa tanytý. Búgingi tańda umyt bolyp jatqan termeler men jyrlardy qaıta jańǵyrtý, tarıhymyzdy ulyqtaý. Sol maqsattaryna jetti de. «Bizben birge» keshi sonyń naq aıǵaǵy. Ata saltyn ardaqtaǵan «Alashulynyń» ánderi jurttyń delebesin qozdyratyn mánerimen birden júrekterdi jaýlap aldy. Ústindegi ulttyq kıimderi de, bıleri de «Alashuly» degen atqa laıyq jarasyp, erekshe ózindik stılderin tanyta bildi.

«Batyrlar urany», «Gıkkáı», «Ýgáı», «Elim meniń ańsaǵan», «Júregim qazaq», «Bizde bári qazaqsha», «Turanym», «Paı-paı», «Mahambettiń jyry», taǵy da basqa ánderi qazaq jerin túgel sharlap, júrekterge jetip, rýhtandyra bilgen uly kúshke ıe. Sol kúshti halyqqa sezdire alǵan «Alashuly» tobynyń jigitteriniń orny Alash jurty úshin qashan da bıikte.

«Bizben birge» shoý konsertine jınalǵan jurttyń bir de biri nemquraıly otyrmady, bári atsalysty, ánshilermen qosa án shyrqady, bıledi,  shapalaqty uzaq soqty. Sebebi jigitterdiń ánderi halyqtyń júregine jetti. Kishkentaı ǵana «Alataý» dástúrli óner teatrynda qoıǵan keshteri áp sátte úlken shoýǵa aınala ketti.

Top ánshileriniń «endigi keshimizdi Respýblıka saraıynda dúrkiretip ótkizgimiz keledi» degen aq armanyn dúıim jurt qoldady.  Ózderin alar asýy alda ekenin aıtady Alashtyń jigitteri. 

Qamshyger: Gúlim Jaqan