Qazaqstan Respýblıkasynyń Qarýly Kúshterinde kóktemgi shaqyrylymnyń jas tolymy áskerı ant qabyldady.

Otanǵa adal ári qaltqysyz qyzmet etý úshin bes myńǵa jýyq merzimdi qyzmettegi áskerı qyzmetshi ant berdi, dep habarlaıdy Qamshy aqparattyq agenttigi QR Qarýly kúshteriniń resmı saıtyna silteme jasap.

 Saltanatty sharalar Qazaqstan Respýblıkasy Qarýly Kúshteriniń áskerı bólimderi men quramalarynda ótkizildi. Otan qorǵaýshylardy ómirlerindegi ataýly kúnmen quttyqtaýǵa QR Qarýly Kúshteriniń ardagerleri, áskerı bólimder men mekemelerdiń qolbasshylyǵy, ata-analary men týǵan-týysqandary keldi.

Merzimdi qyzmettegi áskerı qyzmetshiler ant qabyldaǵannan keıin kishi mamandardy daıarlaý baǵdarlamasy boıynsha jaýyngerlik oqýǵa kirisedi. Jarty jyldan soń olar artılerıashy, tankishi, baılanysshy, atqysh áskerı mamandyqtaryn alady jáne tolyqqandy Otan qorǵaýshylarmen ıyq tirese bir sapqa turady.

11971 áskerı bóliminiń merzimdi qyzmettegi sarbazy Erdos Tórebaı bylaı deıdi: «Áskerde minez-qulqymdy ózgertip, elimniń ıgiligi úshin qyzmet etkim keledi. Áskerıler áýletiniń ókili retinde Qazaqstannyń Qarýly Kúshteri qataryna shaqyrylǵanyma qýanyshtymyn. Armandar oryndalady jáne búgingi kún sonyń jarqyn kórinisi».

 Qazirgi ýaqytta áskerge dene bitimi shynyqqan, bilimdi, moraldyq turǵyda turaqty bozbalalar keledi. Ardagerler men áskerı bólimderdiń komandırleri olar dańqty jaýyngerlik dástúrdiń laıyqty urpaǵyna aınalyp, Qazaqstan Respýblıkasyna qaltqysyz qyzmet etýdiń úlgisi bolatyndaryna kámil senedi.

2017 jylǵy shaqyrý naýqany barysynda Qazaqstan Respýblıkasynyń Qarýly Kúshterine, basqa da áskerleri men áskerı quralymdarynyń qataryna barlyǵy shaqyrylym jasyndaǵy 16 myńnan asa azamat shaqyrylatyn bolady.

Sholýshy: Gúlim Jaqan