Qazaqstan Respýblıkasynyń Reseı Federasıasyndaǵy Tótenshe jáne Ókiletti elshisi Imanǵalı Tasmaǵambetov Reseıdegi joǵary oqý oryndarynda bilim alyp jatqan qazaqstandyq stýdenttermen kezdesti, dep habarlaıdy Qamshy aqparattyq agenttigi.

Kezdesý Máskeý memlekettik halyqaralyq qatynastar ınstıtýtynyń (MMHQI) ǵımaratynda ótti. MMHQI Halyqaralyq basqarma basshysy Egor Andreev qazaqstandyq stýdentterdiń keńes dáýirinen beri MMHQI-diń ajyramas bóligine aınalǵanyn tilge tıek etti. 1999 jyly qazaqstandyq stýdentter qazir quramyna 40 el kiretin birinshi sheteldik Jerlestik odaǵynyń negizin qalady.

«Qazirgi tańda Qazaqstannan kelgen stýdentter ýnıversıtet ómiri men oqý prosesine belsendi qatysýda. Qazaqstandyq jerlestik - 151 adamnan quralǵan eń iri sheteldik jerlestikterdiń biri sanalady. Jerlestik odaǵynyń tóraǵasy Qazaqstan ókili», - dedi Andreev.

Elshi óz kezeginde MMHQI-diń rektorlyq korpýsy men Reseıdegi aldyńǵy qatarly bilim ordasynyń stýdentterimen kezdesý úlken qurmet ekenin atap ótip, osyǵan baılanysty rektoratqa kezdesýdi uıymdastyrǵan jáne yntymaqtastyǵy úshin alǵys aıtty. Ol respýblıkamyzdyń turaqty ekonomıkalyq damýy kadrlardy daıarlaý boıynsha mańyzdy memlekettik saıasattyń arqasynda júzege asqanyn atap ótti.

 «Bolashaq» baǵdarlamasy táýelsizdik alǵanymyzdan keıin birneshe jyl ótken soń quryldy. Asa kúrdeli ýaqytty bastan ótkerip jatqanymyzǵa qaramastan, bilikti mamandardy daıyndaý - birinshi orynda turdy. Osy jyldar ishinde «Bolashaq» baǵdarlamasymen 8,5 myń maman daıarlandy. Reseıde 70 myń stýdent bilim alýda, sonyń 10 myńy - Máskeýdegi joǵary oqý oryndarynda oqyp jatyr. Bul elimiz úshin myqty sanaly urpaq bolyp tabylady», - dedi Tasmaǵambetov.