Memleket basshysy elordanyń aınalasyndaǵy jasyl aımaqty tikushaqpen aralap, oǵan qyrǵaýyldar men elikter jiberýdiń dástúrli sharasyna qatysty. Sondaı-aq, is-shara sońynda buqaralyq aqparat quraldarynyń ókilderi úshin brıfıń ótkizdi.
Qazaqstan Prezıdenti búginde Astana mańyndaǵy 80 myńǵa jýyq gektar jerge aǵash otyryzylǵanyn jáne 2020 jylǵa qaraı onyń aýmaǵy 100 myń gektarǵa jetetinin atap ótti.
Nursultan Nazarbaev «jasyl jelektegi» jan-janýarlar men ósimdik áleminiń ártúrliligine nazar aýdaryp, aǵash egýdi kóbeıtý jónindegi josparlar týraly aıtty.
– Ǵalymdar men ormanshylarǵa atqarǵan jumystary úshin alǵys bildiremin. Bul jerde aǵash ósirý ońaı sharýa emes. Qazir munda úlken orman alqaby paıda boldy. Astananyń aınalasyndaǵy orman keńistigi jan-janýarlar men qustar emin-erkin meken etetin tabıǵı alqapqa aınaldy, – dedi Elbasy.
Memleket basshysy qala mańyndaǵy orman alqaby elordanyń qolaıly klımatyn qalyptastyryp, ekologıasyn jaqsartýda mańyzdy ról atqaratynyn atap ótti.
Sonymen birge, Qazaqstan Prezıdenti orman alqabynyń aýmaǵynda rekreasıalyq aımaq salý nátıjelerine toqtalyp, «jasyl jelekti» «elimizdiń tynysy» dep atady.
– Adamdar osy jerde qansha jyl ómir súrse, ormanymyz da sonsha ýaqyt turady. Bul – elimizdiń baılyǵy. Astanada «EKSPO-2017» halyqaralyq kórmesi ótip jatyr. Ol «jasyl damýdyń» qaǵıdattary men ıdeıasyn ustanatyn qala retinde Astananyń ımıjin nyǵaıtýǵa septigin tıgizedi. Elorda ishindegi saıabaqtar da belsendi túrde jaqsartylýda, – dedi Nursultan Nazarbaev.
Elbasy bolashaq urpaqty, óz eliniń naǵyz patrıottaryn tárbıelep ósirýde tabıǵatty saqtaýdyń jáne týǵan jerdi qurmetteýdiń mańyzdylyǵyna erekshe toqtaldy.
Qazaqstan Prezıdenti orman alqabynyń aýmaǵyn tikushaqpen aralap kórip, «Balqaraǵaı» demalys aımaǵynda ornalasqan etnoaýylda boldy, sondaı-aq «jasyl aımaqty» damytý úshin atqarylyp jatqan jumystardyń barysy men ony odan ári kógaldandyrý josparlary týraly habardar boldy.
Keńeste Aýyl sharýashylyǵy vıse-mınıstri E.Nysanbaev esep berdi. Vıse-mınıstrdiń málimetine sáıkes, búginde 1997 jyldan bastap otyrǵyzylǵan orman alqabynyń kólemi 80 myńǵa jýyq gektarǵa jetti.
E.Nysanbaev otyrǵyzylǵan kóshetterdiń jaǵdaıyna udaıy monıtorıń jasap, respýblıkamyzdyń kásibı uıymdarynyń qatysýymen ǵylymı zertteý jumystaryn júrgizý Astana qalasy mańynda «jasyl jelekti» qalyptastyrýdy qamtamasyz etetin negizgi shara bolyp sanalatynyn aıtty.
Keńeske Prezıdent Ákimshiliginiń Basshysy Á.Jaqsybekov, Astana qalasynyń ákimi Á.Isekeshev, Aqmola oblysynyń ákimi M.Myrzalın, Premer-Mınıstrdiń orynbasary – Aýyl sharýashylyǵy mınıstri A.Myrzahmetov ta qatysty.
Jasyl aımaqty qalyptastyrý týrızm men rekreasıany damytýǵa septigin tıgizedi. Búginde 10 orman paıdalanýshyǵa «Jasyl Aımaq» respýblıkalyq memlekettik kásipornynyń memlekettik orman qory aýmaǵynan mádenı-saýyqtyrý jáne rekreasıalyq maqsatpen ormandy uzaqmerzimdi paıdalanýǵa ýchaskiler berilgen.
Sondaı-aq, Astana qalasynyń shetinde elorda turǵyndary men qonaqtarynyń demalýy úshin Qosshy men Ilınka kentteri arasynda velosıped joly salyndy. Bul jańa tehnologıalyq standarttarǵa saı salynǵan jáne uzyndyǵy 23 shaqyrymdy quraıtyn ári ormandy jerde ornalasqan el aýmaǵyndaǵy birden-bir velosıped joly sanalady. Qala ákimshiligi Astana aınalasyndaǵy velosıped joly jelisin 258 shaqyrymǵa deıin uzartýdy josparlap otyr.
