D.Tramp Amerıka halqy atynan Nursultan Nazarbaevty jáne Qazaqstan halqyn Ortalyq Azıada alǵash ret uıymdastyrylyp otyrǵan Halyqaralyq «EKSPO-2017» mamandandyrylǵan kórmesiniń ótkizilýimen quttyqtady. Bul týraly Qamshy aqparattyq agenttigi Aqordanyń baspasóz qyzmetine silteme jasap habarlaıdy.

AQSH Prezıdenti osy jahandyq sharanyń arqasynda Qazaqstannan jáne dúnıe júziniń túkpir-túkpirinen keletin mıllıondaǵan qonaqtar adam qıalynan nár alatyn tehnologıalyq ınovasıa men 115-ten astam ulttyq pavılondarda kórinis tapqan tamasha áriptestik álemine kýá bolatynyn aıtqan.

«Amerıka Qurama Shtattary Astanadaǵy «EKSPO-2017» kórmesine qatysyp, Amerıkanyń energetıka, ǵylym jáne tehnologıa salalaryndaǵy úzdik jetistikterin, sondaı-aq san qyrly mádenıetimizdi kórsetýdi zor mártebe sanaıdy», – delingen hatta.

Sondaı-aq, D.Tramp AQSH pavılony ótken shırek ǵasyrda elderimiz nyǵaıta túsken strategıalyq seriktestiktiń mańyzdy nyshany bolyp sanalatynyn jáne onyń Qurama Shtattardyń aldaǵy ýaqytta da óńirdegi beıbitshilikti, turaqtylyq pen ósip-órkendeýdi qoldaýǵa degen nıetin bildiretinin atap ótti.

«Prezıdent myrza, «EKSPO-2017» kórmesi arqyly energetıkalyq qaýipsizdik máseleleri jónindegi jahandyq dıalogty odan ári ilgeriletýdegi Sizdiń kózqarasyńyz ben kóshbasshylyǵyńyz úshin Sizge jáne Qazaqstanǵa iltıpatymdy bildiremin. Ózara syılastyq pen ortaq múddege negizdelgen AQSH-Qazaqstan arasyndaǵy strategıalyq seriktestik odan ári nyǵaıa túsedi dep senemin», – delingen hatta.

Sholýshy: Aıgerim Taýbaı