Mılanda ótken QPO b.v. kompanıasyn birlesip basqarý boıynsha komıtet jınalysy kezinde oblys ákimi Altaı Kólginov "BQO Berezovtyqtardy kóshirý tamyzdyń ortasynan keshikpeı bastalýy kerek.", - degen mindet qoıdy dep habarlaıdy Qamshy.kz. Óńir basshysy atap ótkendeı, bıyl oblysta jol, turǵyn úı, áleýmettik nysandar salý syndy 41 jobany júzege asyrý josparlanyp otyr. Olar jer qoınaýyn ıgerýshiler tarapynan júrgizilmekshi.

-QPO b.v. kompanıasynyń 2017 jylǵa arnalǵan áleýmettik-ınfraqurylymdyq aýdarymdary esebinen oblys kólemindegi jalpy uzyndyǵy 70 shaqyrym bolatyn joldardy jóndeý, sonyń ishinde Oral qalasynda 19 shaqyrymy, depo kópirin qaıta salý josparlanǵan.

Jer qoınaýyn ıgerýshilerdiń qarjylary úsh kóp páterli úıdiń (273 páter), bir orta mektep pen dene shynyqtyrý-saýyqtyrý kesheni, Aqsaı qalasy men Bórli aýylynda qos birdeı balabaqshasy qurylysyna, Oraldyń úsh kóshesi men áýejaıǵa deıingi joldy jaryqtandyrýdyń beton tirekteri men áýe jelilerin jerasty jelilerine aýystyrý, qýat únemdeıtin shamdar ornatý, áleýmettik nysandar jóndeý, ınjenerlik jeliler tarýǵa, jol salýǵa baǵyttaldy. Budan basqa Bórli aýdany Araltal aýylynda 100 turǵyn úı qurylysy aıaqtalady.

Barlyq joba ýaqtyly jáne sapaly túrde oryndalýy kerek,-dedi Altaı Seıdiruly.

Jıyn barysynda sondaı-aq, QPO b.v. tarapynan satyp alý kezinde jergilikti qamtý kólemin arttyrý baǵytyndaǵy jumystardy belsendi júrgizý jóninde de kelisimge qoljetkizildi. 2016 jyldyń qorytyndysy boıynsha Qarashyǵanaq jobasyndaǵy qazaqstandyq qamtý kólemi 51,6 paıyzǵa jetip, 530 mln. AQSH dollaryn qurady.