«Astana EKSPO-2017» halyqaralyq kórmesindegi Aýstrıa pavılony eń erekshe pavılondardyń biri bolyp sanalady. Pavılonda «Kúsh mashınasy» dep atalatyn atraksıondardan jáne mehanızmderden quralǵan tutas bir qurylym ornatylǵan. Ol kelýshilerge oıyn arqyly elektr qýatyn óndirýge múmkindik beredi dep jazady  Qamshy.kz aqparat agenttigi QazAqparatqa silteme jasaı otyryp.

Bıiktigi úsh qabatty úımen birdeı bolatyn qurylys 870 sharshy metr bolatyn pavılonnyń barlyq derlik aýmaǵyn alyp jatyr. Osy qoldan jasalǵan bıiktikti Maqsut Jumaev búgin arnaıy álpınısik jabdyqsyz baǵyndyrady. Ol qurylym bórenelerimen órmekshi-adam sekildi órmelep shyǵyp, Qazaqstan men Aýstrıa týlaryn ornatty. Bul - eki el arasyndaǵy yntymaqtastyq pen ózara túsinistikti bildiredi, dep habarlaıdy Aýstrıa pavılonynyń baspasóz qyzmeti.

Álemdegi barlyq segiz myń metrlik shyńdardy ottegi quralynsyz baǵyndyrǵan belgili qazaqstandyq álpınıs Maqsut Jumaev - Aýstrıa eline burynnan beri dostyq nıettegi jan. Bul dostyqtyń bastamasy sonaý 2003 jyly Gımalaı ekspedısıasy kezinde segiz myń metrlik Nangaparbatqa shyǵý aldynda qalandy.

Maqsut álemdegi barlyq segiz myń metrlik shyńdardy ottegi quralynsyz baǵyndyrǵan  tarıhtaǵy alǵashqy áıel adam -  aýstrıalyq álpınıs Gerlında Kaltenbrýnnermen tanysty. 2011 jyly bıiktigi jaǵynan Everestten keıingi álemdegi eń bıik shyń - K2-ge «Taý patshaıymy» Gerlında Kaltenbrýnner jáne qazaqstandyq álpınıser Maqsut Jumaev pen onyń qazaqstandyq áriptesi Vasılıı Pıvsovtyń birge kóterilýi - úsh álpınıs úshin de álemniń segiz myń metrlik shyńdaryn baǵyndyrýdaǵy ózderiniń jeke baǵdarlamalarynyń aıaqtalýy boldy. 2013 jyly Maqsut Jumaev QR Prezıdenti Nursultan Nazarbaevtyń Venaǵa resmı sapary qarsańynda Aýstrıanyń eń bıik núktesi - Grosglokner shyńyn baǵyndyryp, bizdiń elderimizdiń dostyǵy men ózara túsinistiginiń kepili retinde Aýstrıa men Qazaqstan týlaryn ornatty.

Biraq sport Maqsut Jumaevtyń Aýstrıamen yntymaqtastyǵyndaǵy jalǵyz ǵana sala emes. Aýstrıada taýdy eńkeıgen káriden, eńbektegen balaǵa deıin jaqsy kóredi. Elde 150 jyldan astam ýaqyt boıy taý demalysy men tabıǵatyn unatatyn adamdardyń Alpenverein dep atalatyn alpilik qaýymdastyǵy jumys istep keledi. Bul qaýymdastyqpen Maqsut Jumaev yntymaqtastyq jaıly memorandýmǵa qol qoıyp, Qazaqstanda osyǵan uqsas klýb qurdy. Atalǵan klýb endi ǵana damyp kele jatqanymen, tájirıbesi mol aýstrıalyq klýbtyń tájirıbesin jan-jaqty qabyldaýǵa daıyn.

«Men Aýstrıany onyń adam men tabıǵatqa qatysty «jasyl» tehnologıalary úshin qatty syılaımyn. Qazaqstandyq Alpınklýbtyń negizgi maqsaty - barlyq belsendilik, meıli demalys, meıli sport bolsyn, tabıǵattyń tabıǵı tepe-teńdigin buzbaýlary úshin jáne adamǵa qýanysh pen lázzat syılaı tura, tabıǵatqa esh zıan tıgizbeýleri úshin adamdardy tabıǵatpen durys til tabysýǵa úıretý», - dedi Maqsut Jumaev.