Ońtústik Qazaqstan oblysyndaǵy Otyrar tóbeden Hİİİ ǵasyr jádigerleri tabyldy. Álkeı Marǵulan atyndaǵy Arheologıa ınstıtýtynyń mamandary tarıhı orynnan Mońǵol shapqynshylyǵy kezindegi káriz júıeleri, ydystar men tıyndardy tapqan, dep habarlaıdy Qamshy.kz aqparat agenttigi QazAqparatqa silteme jasaı otyryp.

Órkenıettiń izi qalǵan qasıetti Otyrar tóbede jumbaq syrlar jeterlik. Tarıhı jádigerlerge toly mekende týrıser legi de tolastaǵan emes. Sebebi, tarıhtyń talaı syryn ishine búgip jatqan bul mekenniń jumbaǵy áli de kóp. Soǵan baılanysty munda josparlanǵan qazba jumystary da júıeli júrgizilip keledi. Dál qazir kıeli jurtta Álkeı Marǵulan atyndaǵy Arheologıa ınstıtýtynyń mamandary qazba jumystaryn júrgizýde.

«Biz qazir Mońǵol shapqynshylyǵy bolǵan 13 ǵasyr deńgeıine jettik. Sol kezeńdi beıneleıtin buıymdar men tıyndar shyǵyp jatyr. Onyń árqaısysy ótken ómirden syr shertedi. Ol jádigerler ábden zerttelip bolǵan soń, murajaıǵa qoıylady», - deıdi  Á. Marǵulan atyndaǵy Arheologıa ınstıtýtynyń ǵylymı qyzmetkeri Ilár Akomoldınov.

Qatpar-qatpar topyraqtyń ishinen ár dáýirdiń izin taýyp, taný da úlken biliktilikti qajet etedi. Óıtkeni, Otyrar bútin saqtalǵan qala emes. Birneshe márte qıraýǵa ushyraǵan. Búginde arheologtardyń kóp sharýasy jergilikti turǵyndar kómegimen de ilgeri basýda. Aýyl adamdary 3-shi jańǵyrý tusynda elin tanýǵa, jerin bilýge qushtarlyq tanytyp otyr. Arnaıy topqa qol kúshimen járdemdesýde. «Biz osyndaı ólkede týǵanymyzǵa maqtanamyz. Munda kelýshiler kóp. Sondyqtan osy qazba jumystaryna ylǵı qatysamyz. Bul - bizdiń kómegimiz, ári úlesimiz», - deıdi jergilikti turǵyn Baýyrjan  Imanberdıev.