Kúni keshe Muhamedjan Tazabek radıkaldy toptyń múshesiniń sózin sóıleıdi degen mátindegi maqala jarıalanyp, áleýmettik jeli qoldanýshylarynyń arasynda daý týǵan edi. Muhamedjan Tazabekti ýahabılik aǵymdy nasıhattap júr dep jala japqan avtor búrkenshik esimdi qoldanǵan. Osy máselege baılanysty Muhmedjan Tazabekpen Qamshy.kz aqparat agenttiginiń  tilshisi habarlasqan bolatyn.  

«Eń aldymen, maǵan taǵylǵan aıyptaýlardy joqqa shyǵaramyn. Feısbýkte mıllıardqa jýyq qoldanýshy bar desek, áleýmettik jeli qoldanýshylaryn jete tanyp, olardyń baǵyttaryn bilip júrý múmkin emes. Ádette, áleýmettik jelide aqparat bólisken ýaqytta avtory emes, jazba kontentine kóńil bólemiz. Al atalǵan jazba janaza týraly jáne onda zańǵa qaıshy keletin, «qutylyp ketýim neǵaıbyl» dúnıe bolmaǵanyn aıtqym keledi.

Post avtorymen tanys emespin jáne onyń basqa jazbalarymen tanysyp, ustanymyn bilgen bette, jyldam paraqshamnan alyp tastadym. Tıisinshe, onyń "qaýipti adam ekenin" bilip turyp jarıalaýym jáne az ýaqyttyń ishinde "on myńdaǵan adamdy jat aǵymmen ýlap jiberýim" áste múmkin emes.

Sondyqtan zań aldynda jaýap bersin degen «úmitterdiń» de orynsyz ekenin aıtqym keledi.

Kerisinshe, maqala men ony bólisýshilerdiń meniń atymdy Aqtóbe men basqa aımaqtarda bolǵan terrorlyq aktilermen baılanystyrýy jáne ýahabılik ýaǵyzdy tyqpalap júr deýi - kórineý jáne bedelimdi túsiretin aqparat dep bilemin.

Atalǵan jaǵdaıǵa baılanysty QR Konstıtýsıasy men zańdaryna sáıkes óz abyroıymdy qorǵaý maqsatynda quqyq qorǵaý organdaryna shaǵym túsirý quqyǵym bar», - dep Asyl arna telearnasynyń dırektory ózine baılanysty pikir bildirgenderge jaýap berdi. Qazirgi kezde zańgerlermen keńesip jatqandyǵyn da aıtqan bolatyn.