2017 jylǵy 11 tamyzda saǵ. 19.00-de «Qazaqstan» ortalyq konsert zalynda Qazaqstan Respýblıkasy Mádenıet jáne sport mınıstrliginiń, Astana qalasy ákimdigi men Ermek Serkebaev atyndaǵy mádenıetti jáne ónerdi qoldaý qorynyń qoldaýymen EKSPO-2017 Halyqaralyq mamandandyrylǵan kórmesiniń aıasynda «Ermek Serkebaevqa arnalady» atty álemdik opera juldyzdarynyń Gala-konserti ótedi dep habarlaıdy Qamshy.kz aqparat agenttigi.

Gala-konsert ataqty qazaqstandyq ánshi, KSRO halyq artısi, KSRO jáne QazKSR Memlekettik syılyqtarynyń ıegeri, Sosıalısik Eńbek Eri Ermek Serkebaevty eske alý maqsatynda uıymdastyrylyp otyr.

Quramy boıynsha aıryqsha bolyp tabylatyn bul konsertke álemge tanymal ánshiler óner kórsetedi, onyń ishinde álemniń úzdik bas daýys ıesi, Gremmı syılyǵynyń eki dúrkin ıegeri, Metropolıten-opera (Nú-Iork), Marıın teatry men Parıj operasynyń solısi Ildar Abdrazakov, Marıın teatrynyń solısi, Opera Awards (London q.) syılyǵynyń laýreaty Asmık Grıgorán, Úlken teatrdyń jetekshi solısi, Plasıdo Domıngonyń «Operalıa - 2016» konkýrsynyń jeńimpazy Bogdan Volkov, Úlken teatrdyń jetekshi solısi Igor Golovatenko, Marıın teatrynyń solısi Sergeı Skorohodov, Máskeýlik «Novaıa Opera»  teatrynyń solısi Alekseı Tatarınsev, Úlken teatrdyń solısi  Agýnda Kýlaeva, «Astana Opera» teatrynyń jetekshi solıseri, Qazaqstan Respýblıkasynyń eńbek sińirgen qaıratkerleri Súndet Baıǵojın, Saltanat Ahmetova, Astana qalasy Memlekettik akademıalyq fılarmonıasynyń solısi Azamat Jyltyrkózov.

Ermek Serkebaevty eske alý keshinde álemdik opera klasıkasynyń jaýharlary, Dj. Rossını, Dj. Verdı, Sh.Gýno, A.P. Borodın, K. Sen-Sans, J. Bıze, P.I. Chaıkovskıı, A. Dvorjak, G. Donısettı, Dj. Pýchchını, A.Q. Jubanov, L. Hamıdı operalarynan arıalar shyrqalatyn bolady.

Konsertke Reseıdiń eńbek sińirgen artısi, Tatarstannyń halyq artısi Renat Salavatovtyń jetekshiligimen «Astana Opera» teatrynyń sımfonıalyq orkestri qatysady. Keshtiń qoıýshy rejıseri, álemdik opera, teatr jáne konserttik shoýlardyń úzdik jáne jarqyn rejıserlarynyń biri  Vasılıı Barhatov bolmaq. Arnaıy osy konsert úshin aıryqsha dekorasıalar men beınekontent quryldy.