Ońtústik Qazaqstan oblysynyń bes myńnan astam turǵyny bar Darbaza aýylynda qara halyq jappaı aýrýǵa shaldyǵyp jatyr. Balalarynyń basy aınalyp, muryndarynan qan ketse, tekserýden ótken qyryq áıeldiń omyraýynan qaterli isiktiń belgisi anyqtalǵan. "Kúndiz de, túnde de dalaǵa shyǵýdan qaldyq" dep ashynǵan qara halyq osynyń barlyǵyna sebep –aýyl irgesindegi shaıyr óndiretin zaýyttan shyǵatyn zıandy tútin dep otyr, dep habarlaıdy Qamshy.kz aqparat agenttigi 31 arnaǵa silteme jasaı otyryp.

Saryaǵashtyń Darbaza aýylynyń turǵyndary túngi birden tań atqanǵanǵa deıin syrtqa shyqqan kez kelgen bala eriksiz jylaıtynyn, al kúndiz tynysy tarylǵannan murny qanap, basy aınalýy jıiledi dep otyr. Aıaǵy aýyr kelinderdiń túsik tastaýy beleń alǵan. Alty jasar balasynyń aýrýǵa shaldyqqanyn aıtqan darbazalyq Sholpan Úkibaeva, basy aınalyp qulap qala bergen eki balasyn aýyldan alystatypty. Syrttan kelgen qonaqtar bolsa, jaǵymsyz ıisten áp-sátte mazasy qashatyn kórinedi.      

Sholpan Úkibaeva, turǵyn:

– Al ózimniń alty jasar balam kádimgideı, mama smoladan basym aýyrady dep murny qanaıdy. Aıap ketesiń. Meniń qazir eki balam, senbeseńiz aparamyn, ózimniń sheshimniń úıinde júr. Tórt aıdan beri sheshemniń úıinde júr.    

Baıan Qulboldıeva, turǵyn:

– Meniń kelinim mine, eki egiz balasyn túsirip aldy. Osy smola dep.

Naǵıma Jarmentaeva, turǵyn:

– Bir jaqtan bireý qydyryp kelse, kádimgideı loqsyp qusady. Sony ıiskegen kezde.

Eń soraqysy, alpys úsh áıeldi tekserýge alǵan dárigerler qyryq áıeldiń omyraýynan qaterli isiktiń belgisin anyqtapty. Bul jaǵdaı saqtala berse, aýyl halqy túgel qyrylyp ketpek, – deıdi turǵyndar. 

Janıa Abdýllaeva, turǵyn:

– Biz sharshadyq. Sharshaǵannan buryn balalarymyz qan qusyp jatyr. Shash túsip jatyr. Tyrnaq túsip jatyr. Biz qaıda baramyz, sony aıtyńdarshy. Sonda alpys úsh adamnan qyryq adam rak. Keshe aıtty ǵoı medbıke.

Halyqtyń shaǵymy zaýyt ashylǵaly týyndap otyr degendi bıliktiń ózi de rastady. Narazylyq jıilegen soń, quzyrly mekemedegiler bas qosyp, jıyn da ótkizipti. Oǵan zaýyt ókilderi de qatysypty. Al dárigerlerdiń naýqastar sanynyń kúrt óskendigi jaıly aqparatty ákimdik rastady.   

Qudiret Qystaýbaev, Saryaǵash aýdany ákiminiń orynbasary:

– Qazirgi tańda aýdandyq prokýratýra tarapynan is qozǵaldy. Oblystyq ekologıalyq komıtetinen tıisti qaýly shyǵaryldy. Sonyń tıisti mamandary laboratorıasymen kelip, bul zaýyt jóninde naqty jumystar júrgizip, óziniń sheshimin beretin bolady.

Bılik halyqqa zaýyt basshysy Serik Aǵabekovtyń ýádesin aldyq, búginnen bastap zaýyt óz jumysyn tolyqtaı toqtatty dep málimdedi. Alaıda turǵyndar pikiri basqa. Olar halyqty ýlap otyrǵan qoıý qara tútinniń azdap saıabyrsyǵany bolmasa, toqtady degeni ótirik dep otyr. Eger ýlaný deregi osylaı jalǵasa berse, halyq temir joldy jabamyz deıdi.