Munaı baǵasy

Malaızıalyq Star gazeti "Malaızıa munaı óndirýdi ulǵaıtty" degen maqalasynda baǵanyń quldyraýyn tejeý maqsatynda OPEK-ke (munaı óndirýshi elder uıymy) múshe jáne munaı óndirýshi ózge elder ókilderi munaı óndirý kólemin azaıtý kelisimin oryndaý joldaryn talqylaǵan Abý-Dabıdaǵy kezdesý jaıly jazǵan. Reseı, Kýveıt, Saýd Arabıasy ókilderi men OPEK-tiń Venadaǵy shtab-páteri ókilderinen qurylǵan paneldik komısıa uıymnyń munaı óndirý qarqynyn tejeý sheshimin qoldaıtynyna kóz jetkizý úshin Qazaqstan, Irak, BAÁ jáne Malaızıa ókilderimen jeke-jeke kezdesý ótkizgeni habarlanady.

Buǵan deıin OPEK elderi, Reseı jáne munaı óndirýshi ózge elder 2018 jylǵy naýryzdan bastap óndirý kólemin kúnine 1,8 mıllıon barelge azaıtýdy uıǵarǵan bolatyn. "Óndirý kólemine monıtorıń júrgizý úshin OPEK paıdalanatyn aqparat OPEK-tiń eń iri elderi - Irak pen BAÁ álgi sheshimdi tolyq oryndamaı otyrǵanyn kórsetti. Al OPEK-ke múshe emes Qazaqstan men Malaızıa keıingi birneshe aıda óndirý kólemin arttyrǵan" dep jazady Star gazeti.

Ulybrıtanıalyq Reuters agenttigi jarıalaǵan "OPEK munaı óndirý kólemin azaıtý paktisi sharttary qaz qalpynda oryndalady dep úmittenedi" degen maqalada da munaı baǵasyna qatysty ahýal jaıly jazǵan. "OPEK elderi men seriktes elder artyq munaı óndirý qarqynyn tejeı almaıdy degen qaýiptiń kesirinen munaı baǵasy bıyl jeti paıyzǵa jýyq túsip ketti" dep jazylǵan maqalada.

Osy aptanyń basynda munaı baǵasy bir jarym paıyzdan kóp quldyrap, U.S. West Texas Intermediate crude markaly munaıdyń bir barreli 48,59 dollarǵa, al Brent crude futures markasynyń baǵasy – 51,9 dollarǵa turaqtady. "OPEK elderi 2018 jyly munaıǵa suranys kóbeıip, keler jyly básekeles elder munaı óndirý kólemin azaıtady dep boljaǵanymen, bul topqa kiretin elderdiń óndirý kólemin taǵy ulǵaıtýy artyq óndirilgen munaı kólemi usynys kólemin shekteý áreketterine qaramastan, naryqta áli azaımaıtynyn baıqatty" dep jazady Reuters.

Jańa sanksıalardyń "Qazaqstanǵa kesiri tımeıdi"

Brıtandyq Financial Times gazeti "Qazaqstan AQSH munaı óndirýshilerin jańa sanksıalarǵa qatysty jubatyp jatyr" degen maqalasynda AQSH-tyń munaı óndirýshilerin olardyń Qazaqstandaǵy jobalary Máskeýge qarsy jańa sanksıalar leginen zardap shekpeıdi dep ılandyryp qoıdy, bul "energetıka salasyndaǵy Reseımen tikeleı baılanysy joq ınvestısıalarǵa tym qatal shekteýlerdiń kesiri tıedi degen qorqynyshty sál seıiltti" dep jazǵan.

Áńgime byltyr qazaqstandyq Teńiz munaı kenishine 37 mıllıard dollar quıýǵa kelisken amerıkalyq Chevron men Exxon Mobil kompanıalary jaıly. Álgi kenishte óndirilgen munaı áýeli Qara teńizdegi portqa, keıin Reseı arqyly ótetin Caspian Pipeline Consortium (CPC) qubyrymen Eýropaǵa jetkiziledi. Budan bólek, munaı qubyrynyń bir myńdaı kılometri Reseı terıtorıasy arqyly ótedi ári onyń 31 paıyzy Reseıge tıesili.Buǵan qosa, Batys sanksıa salǵan reseılik eki kompanıa - Rosneft pen Lukoil kompanıalarynyń álgi jobada úlesi bar.

Financial Times gazeti Qazaqstannyń ekonomıka mınıstri Tımýr Súleımenovtiń "Bizdiń munaıymyzdy teńizge, mysaly, Novorossııskige deıin jetkizetin qubyrǵa sanksıanyń kesiri tımeıdi" degen sózin keltirgen.

Reseı energetıka mınıstrligi Máskeý Qyrymdy aneksıalap alǵan 2014 jyldan beri Batys elderi salyp kele jatqan sanksıalardyń kózdegen negizgi maqsattarynyń biri bolǵanymen, Reseıdiń eksport qubyrlaryn qarjylandyratyn nemese demeıtin kompanıalarǵa qarsy nysanaly sanksıalar salý sheshimi kóbinese "Gazpromnyń" "Soltústik aǵyn-2" gaz qubyry jobasyna qarsy qabyldanǵan. Germanıaǵa Baltyq teńizi arqyly ótetin álgi qubyr jobasyn ishinara Shell, Engie, Wintershall, Uniper jáne OMV kompanıalary qarjylandyrady.

Qazaqstandyq programmıst oqýshylar

Mashable ınternet-blogynda Google kompanıasynyń bas dırektory Sýndar Pıchaıdyń programmısterdiń 2017 jylǵy halyqaralyq konkýrsynda jasaǵan málimdemesine qatysty komentarı jarıalanǵan. 10-18 jas aralyǵyndaǵy qyzdar arasynda ótken osy bedeldi konkýrsta gran-prılerdiń birin áıelderdiń qaýipsizdigin qamtamasyz etetin QamCare baǵdarlamasyn qurastyrǵany úshin bıyl qazaqstandyq tórt oqýshy qyz aldy. Konkýrsqa 103 elden 11 myńǵa jýyq programmıst boıjetken qatysqan.

Jetkinshek qyzdar komandalaryna arnalǵan sózinde Sýndar Pıchaı "Google kompanıasynda, bul bızneste izderge oryn daıar" dedi. Álgi málimdeme Google kompanıasynyń burynǵy ınjener-programmısi erler men áıelder arasynda "bıologıalyq aıyrmashylyq" bar bolǵandyqtan, kompanıada er adamdar kóbirek dep málimdegen "alýan túrlilikke qarsy manıfes" jarıalaǵannan soń birer kúnnen keıin jasaldy. Álgi málimdeme jurttyń aıyptaýy men synyna ushyraǵan bolatyn.

Mashable blogynyń álgi "manıfeske" qatysty komentarı bergen taǵy bir maqalasynda áıelder men er adamdar alatyn jalaqy arasyndaǵy úlken alshaqtyq úshin qazir amerıkalyq Google kompanıasyn jergilikti bılik tekserip jatyr dep jazǵan.

Mashable ınternet-blogyndaǵy maqalada qazaqstandyq tórt mektep oqýshy qyz qurastyrǵan QamCare baǵdarlamasynyń vıdeoprezentasıasyna silteme bar.

6-7 jasynda mýzyka sabaǵynan úıine jalǵyz qaıtýyna týra kelip, qarańǵy túsip ketkendikten, jolda adasyp ketkeni týraly aǵylshyn tilinde ózi áńgimelep bergen 9 jastaǵy Baıannyń basynan ótken oqıǵany mysalǵa keltiredi. Sátin salǵanda, jol-jónekeı ony kórshi áıel jolyqtyryp, úıinde alańdap otyrǵan áke-sheshesine ertip aparǵan.

Prezentasıada QamCare baǵdarlamasy uıaly telefondarǵa qosymsha retinde qalanyń qarańǵy qaltarystarynda úıge jol taýyp barýǵa ǵana emes, joǵalyp ketken adamdy izdeýge de qalaı kómektesetini kórsetilgen. Adamdar jumbaq kúıde joǵalyp ketetin jaǵdaılar Qazaqstan ǵana emes, kóp elderdiń de problemasy. Álgi rolıkte jas qyz-jigitter men balalardyń ata-analarynyń aty-jóni men turatyn jeri tolyq kórsetilmeı, esimderi ǵana atalady, biraq olardyń bári aǵylshynsha jatyq sóıleıdi.