Qyzylordada 65 jastaǵy Tólesh Quıryqbaeva «Qamqorlyq» atty daǵdarys ortalyǵyna kelip túsken. Zeınetkerdiń aıtýynsha, ol 45 jyl boıy kúıeýiniń tarapynan qorlyq pen mazaqqa tózip kelgen. Onyń 5 balasy bar, alaıda olardyń bireýi de anasyna qamqorlyq jasaı almaıdy eken dep habarlaıdy Qamshy.kz aqparat agenttigi Astana arnasyna silteme jasaı otyryp.

«Meniń eshkimim joq, ózim balalar úıinde tárbıelengenmin. Balalarym nesıe alyp berýimdi ótingen soń, alyp bergenmin. Úıleriniń shatyryn aýystyryp berýimdi surady, ony da aýystyryp berdim, tek solardyń jaǵdaıy jaqsy bolsa boldy. Al, endi olardyń eshbiriniń maǵan qamqorlyq jasaýǵa jaǵdaılary kelmeıdi, analaryna kómek kórsete almaıdy eshbiri. Ómirde bir qatty qýanǵan kezim bolmaǵan. Alaıda, men berilmeımin, bireýdiń úıin jınap, kórpe tigý kerek bolsa da, kásip qylamyn», –deıdi qart ana.

Sońǵy jarty aıdyń ishinde atalmysh ortalyqqa týystary bas tartqan 4 qart áje kelip túsken. Olardyń bireýin týystary taýyp alyp ketti. Qalǵandary qarttar úıine ornalasý úshin qujattardyń rásimdelýin kútip otyr.

Daǵdarys ortalyǵynyń dırektorynyń aıtýynsha, qartaıǵan ata-analarynan bas tartý búgingi qoǵamda qalypty jaǵdaıǵa aınalyp bara jatyr. Kópshilik jastar ózderiniń ata-analaryna qamqorlyq tanytqylary kelmeıdi. Qazirgi tańda, oblystyq qarttar úıinde 160 qarıa turady, olardyń 101-niń bala-shaǵasy bar.

«Osy ýaqytqa deıin eki áje osynda turyp qalypqa túsip, ómirge beıimdele bastady. Qazir memlekettik jaýapty tulǵalarmen jumys jasap jatyrmyz. Keıinnen úsh apanyń bireýi qarttar úıine tapsyrylady. Bálkim, bireýiniń joly bolyp, úıine oralyp, jaqsy ómir súrip qalar dep úmittenemiz», – deıdi «Qamqorlyq» ortalyǵynyń dırektory Jandos Tusmaǵambetov.