1 maýsym 15 tamyz aralyǵynda Astana qalasynyń jumyspen qamtý ortalyǵy arqyly 2500-ge jýyq adam jumysqa ornalastyrylǵan dep Qamshy.kz aqparat agenttigi Astana qalasy ákimdiginiń baspasóz qyzmetine silteme jasap habarlaıdy.

Astana jumyssyzdyq deńgeıi boıynsha eń tómengi kórsetkishpen kósh bastap tur. 1 tamyzǵa deıingi jaǵdaı boıynsha 10 000 jańa jumys orny ashylyp, olardyń qatarynda shaǵyn jáne orta bıznes te bar. 

«Halyqaralyq mamandandyrylǵan EXPO-2017 kórmesin ótkizý barysynda Astana qalasy ákimdiginiń Halyqty jumyspen qamtý ortalyǵyna 4 012 turǵyn jumysqa ornalastyrý ótinishimen keldi. Olardyń 2409 adamy jumyssyzdyqtan áleýmettik qorǵaýmen qamtyldy. Jumys berýshiler arasynda qonaq úı mamandyqtary boıynsha suranys ósken, bul – aspaz, qonaq úı bıznesiniń menedjeri, gıd-aýdarmashylar, qyzmet kórsetýshiler. Mysaly, bizdiń ortalyq arqyly EXPO-2017 kórmesi aýmaǵyndaǵy jańa «Hilton» oteline 100 adam jumysqa turdy», – dep habarlady Astana ákimdiginiń jumyspen qamtý ortalyǵy baspasóz qyzmetiniń basshysy Aıajan Aıtjanova Astana Konvenshn Búro kompanıasynyń ókilderine. 

Resmı málimetterge saı, atalǵan departament statısıkasy boıynsha 2017 jyldyń İİ toqsanynda Astanada jumyssyzdyq deńgeıi 4,5% quraǵan (jyldyq jospar boıynsha 4,7%).