Shekarashylar eskertýin elemeı, olarǵa qarsy tas atyp, shekaradan zańsyz jylqy ótkizbek bolǵan Jambyl oblysynyń turǵyndary anyqtaldy. Bul týraly Ulttyq qaýipsizdik komıteti tóraǵasynyń orynbasary, shekara qyzmetiniń dırektory eksklúzıvti suhbatynda aıtty. Zańsyz áreketke jol bergenderdiń barlyǵy tergelip jatyr. Darhan Dilmanovtyń aıtýynsha, olar Qyrǵyzstannan kelgen kontrabandalyq júkti, ıaǵnı jylqyny shekaradan zańsyz ótkizbek bolyp, qorshaýlardy buzǵan dep habarlaıdy Qamshy.kz aqparat agenttigi Astana arnasyna silteme jasap.

Darhan Dilmanov, QR Ulttyq qaýipsizdik komıteti tóraǵasynyń orynbasary, shekara qyzmetiniń dırektory:

"Zańbuzýshylyqqa qatysqan barlyq tulǵalarǵa qatysty jáne shekara qyzmetindegi ınjenerlik-tehnıkalyq nysanǵa nuqsan keltirgen barlyq tulǵalardyń áreketi anyqtalyp, qazir olarǵa qatysty tergeý amaldary júrgizilip jatyr. Jýyq arada barlyq nátıjeler belgili  bolady".

Eske salaıyq, ótken jeksenbide Jambyldaǵy qazaq-qyrǵyz shekarasynda oq atylyp, adam óldi. Shekara qorshaýlaryn buzbaq bolǵan 20 shaqty adamdy shekarashylar toqtatpaq bolady. Alaıda olar saqshylarǵa tas atyp, jaraqattaıdy. Zańsyzdyqty toqtatý úshin shekara qyzmetkeri oq atyp, bir adam ajal qushady. Qazir eki tarapqa qatysty qylmystyq is qozǵaldy. Shekarashynyń qarý qoldaný áreketiniń zańdylyǵy da tekserilmek.